22-nji oktýabr — 1-nji noýabr aralygynda Aşgabatda Türkmenistanyň Küşt federasiýasynyň Kubogy geçiriler. Bu giň gerimli bäsleşik küştçülere baýrak gaznasy, medallar hem-de has ýokary derejeli ýaryşlara gatnaşmak hukugy ugrunda bäsleşmäge mümkinçilik döredýär.
Ýaryşlar üç görnüş boýunça geçiriler: standart küşt, rapid we blis. Bäsleşigiň umumy baýrak gaznasy 10 000 manada deňdir. «A» toparçada ýeňijiler we baýrakly orunlaryň eýeleri birinji, ikinji we üçünji orunlar üçin degişlilikde 3 000, 2 000 we 1 000 manat alarlar. «B» toparçada bolsa baýraklar 500, 300 we 200 manat bolar. Mundan başga-da, ýaryşyň düzgünnamasynda weteranlar, zenanlar hem-de dürli ýaş toparlaryna degişli ýaş türgenler üçin ýörite baýraklar göz öňünde tutulandyr.
Pul baýraklaryndan we sylaglardan başga-da, ýaryşda üstünlikli çykyş etmek gatnaşyjylar üçin täze sport mümkinçiliklerini açýar. Bellenen toparlarda ýeňijiler we iň gowy netije görkezen zenan gatnaşyjylar 2027-nji ýylyň Ýokary ligasyna gatnaşmak hukugyna eýe bolarlar, rapid we blis boýunça iň güýçli küştçüler bolsa halkara ýaryşlarda ýurdumyza wekilçilik edip bilerler.
Ýaryş Aşgabat şäheriniň Ýöriteleşdirilen küşt we şaşka mekdebinde geçiriler.
Gatnaşyjylary hasaba almak onlaýn tertipde https://bit.ly/kuboktkf2026 salgysy arkaly alnyp barylýar we 17-nji oktýabra çenli (sagat 18:00-a çenli) dowam eder.
