Ýekşenbe güni ýurdumyzyň çar künjünde güýzki at çapyşyklarynyň nobatdaky tapgyry giň gerim aldy. Bedewler we olaryň çapyksuwarlary dürli aralyklarda güýç synanyşdylar. Ýadawsyz yhlasy, ýokary taýýarlygy talap edýän at çapyşyklarynda ökdeler öňe saýlanyp, gymmat bahaly sowgatlar bilen sylaglanyldy. Bu barada «Türkmenistan» gazetinde habar berildi.
Aşgabat atçylyk sport toplumynda geçirilen çapyşyklaryň 10-synda dürli edara-kärhanalara degişli bedewler ýeňiş gazanmagy başardylar. Birinji çapyşykda Türkmenistanyň Prezidentiniň Ahalteke atçylyk toplumyna degişli Baýrak atly gara at pellehanadan ilkinji bolup geçdi. Çapyşyklaryň ikinjisinde Garaman diýen dor at ýeňiji bolmagy başardy. Özara güýç synanyşýan bedewleriň üçünji çapyşygynda Türkmenistanyň Azyk senagaty döwlet birleşigine degişli bolan Ýelpaý atly dor gysrak öňe saýlandy. Dördünji çapyşyga hem çekeleşikli pursatlar mahsus bolup, onda Gümmez II diýen dor at ýeňiji diýlip yglan edildi. Bäşinji çapyşygyň ýeňijisi bolan Gülpeýker atly bedewiň görkezen netijesi hem ýatda galyjy boldy. Altynjy çapyşykda bolsa Aýnäzik atly bedew öňe saýlandy. Ýedinji çapyşygyň ilkinji ornuny Garabedew atly gara at eýeledi. Bedewlerden we olaryň çapyksuwarlaryndan ýokary ussatlygy talap eden sekizinji çapyşyk Parasatly diýen gara gyr atyň ýeňşi bilen tamamlandy. 1 müň 600 metr aralyga geçirilen dokuzynjy çapyşygyň netijeleri boýunça Türkmenistanyň Prezidentiniň Ahalteke atçylyk toplumyna degişli Zaman atly mele at öňe saýlandy. Jemleýji çapyşykda Çaparly atly bedew özüniň ýyndamlygyny subut edip, pellehanadan birinji bolup geçdi. At çapyşyklary 1 müň, 1 müň 200, 1 müň 400, 1 müň 600 hem-de 1 müň 800 metr aralyklarda guraldy.
At çapyşyklary Balkan atçylyk sport toplumynda hem-de Daşoguz welaýatynyň atçylyk sport toplumynda hem guraldy. Lebap atçylyk sport toplumynda geçirilen çapyşyklar hem ýyndam bedewleri öňe saýlady. Mary atçylyk sport toplumynda geçirilen at çapyşyklary hem täsirliligi bilen tapawutlandy.
Ýurdumyzyň sebitlerinde guralan at çapyşyklarynda baýrakly orunlara eýe bolan bedewlere serpaý ýapylyp, çapyksuwarlara gymmat bahaly sowgatlar gowşuryldy.
