Bakuwyň halkara deňiz portunda Türkmenistanyň gämi gurluşyk meýdançalarynda gurlan «Gadamly» atly ilkinji gury ýük gämisini garşy almak dabarasy geçirildi. «Trend» agentliginiň habar bermegine görä, täze gämi Baku we Türkmenbaşy portlarynyň arasynda yzygiderli gatnap, esasan hem, konteýner daşamalaryny amala aşyrar.
Ýük göterijiligi 6100 tonna, sygymy bolsa 20 tonnalyk 240 sany ýük konteýnerini daşamaga niýetlenen «Gadamly» gämisiniň ulanylmagy Orta geçelgäniň kuwwatyny pugtalandyrmaga gönükdirilendir. Hünärmenler bu gäminiň hyzmatdaşlyga girizilmeginiň Ýewraziýa ulag ugrunyň ösmegine möhüm goşant boljakdygyny we ýyllyk ýük dolanyşygynyň möçberini ep-esli artdyrmaga mümkinçilik berjekdigini belleýärler.
Ýatlap geçsek, Türkmenbaşy şäherindäki «Balkan» gämi gurluşyk we abatlaýyş zawodynda gurlan täze gury ýük gämisi 8-nji maýda Türkmenistanyň Prezidentiniň gatnaşmagynda ulanmaga berlipdi.
