Türkmenistanda TÜRKSOÝ-yň hemaýat bermeginde geçirilýän «Ýüpek ýoly — Gündogar–Günbatar; Dunaý–Orhun» atly bäşinji halkara awtorallisiniň gatnaşyjylary garşylanylýar. Rowaýata öwrülen Beýik Ýüpek ýolunyň ugurlaryny gaýtadan janlandyrýan bu taslama medeni gatnaşyklary ösdürmegi we halklaryň arasyndaky dostlukly hyzmatdaşlygy pugtalandyrmagy maksat edinýär.
Türkiýeden, Germaniýadan, Italiýadan, Belgiýadan we Bolgariýadan bolan ekipažlar, Baku şäherinden Türkmenbaşy halkara deňiz portuna geldiler we Balkan welaýatynyň çäginden geçdiler. Saparyň maksatnamasyna ýurdumyzyň gözel ýerlerine, ýagny Ýangugala jülgelerine we Köwata ýerasty kölüne baryp görmek çäreleri hem girizildi.
Paýtagtymyz Aşgabada aýratyn ähmiýet berildi. Bu ýerde ralliniň gatnaşyjylary döwrebap ýol düzüminiň hiline we kabul ediji tarapyň myhmansöýerligine ýokary baha berdiler. Paýtagtymyzdaky sapar tamamlanandan soň, awtoulag kerweni ýurdumyzyň demirgazyk sebitleriniň üsti bilen Özbegistanyň serhedine tarap ugrar.
