Aşgabat şäherindäki 55-nji orta mekdepde «Soňky jaň» dabarasy mynasybetli geçirilen çäräniň dowamynda Russiýanyň diplomatlary bu mekdebe 20 sany ekologik guş öýjagazyny sowgat berdiler. Bu guş öýjagazlary şol mekdebiň 7-nji synp okuwçysy Öwezmyrat Sapargeldyýewiň taslamasy esasynda taýýarlandy.
Mekdebiň ýedinji synp okuwçysy öz ýaşaýan sebitinde serçeleriň sanynyň azalýandygyna üns beripdi. Biologiýa mugallymy Anna Şamowanyň ýolbaşçylygynda okuwçy bu ýagdaý boýunça ylmy-barlag işini geçirdi. Netijede, şäheriň döwrebap ösüşiniň, temperaturanyň üýtgemeginiň, iým binýadynyň we höwürtge gurmak üçin amatly ýerleriň azalmagynyň guşlaryň sanynyň peselmegine täsir edýändigi anyklandy. Gözegçilikleriň netijesinde Öwezmyrat «Howanyň täsirine durnukly şertlerde guş öýjagazyny gurmak» atly taslamany işläp düzdi.
Taslamanyň esasy maksady guşlar üçin howpsuz we durnukly şertleri üpjün edýän ýörite guş öýjagazlaryny döretmekden ybaratdyr. Öýjagazlaryň gurluşynda içki temperaturany sazlamaga kömek edýän izolýasiýa materiallary (saman ýa-da penoplast) ulanylýan agaç gatlaklary peýdalanyldy. Bu täsirli tehnologiýanyň ulanylmagy serçeleriň höwürtgeleriniň içindäki temperaturany 4,5 dereje peseltmäge mümkinçilik berdi. Şunuň netijesinde bolsa jüýjeleriň aman galmak derejesi 35% ýokarlandy.
Höwürtgeleri gowşuryş dabarasynda Russiýa Federasiýasynyň Türkmenistandaky ilçihanasynyň geňeşçi-wekili Aleksandr Wasilýew Russiýanyň Adatdan daşary we Doly ygtyýarly ilçisi Iwan Wolynkiniň ýüzlenmesini okap berdi.
Diplomatik wekilhananyň ýolbaşçysy Russiýa Federasiýasynyň Türkmenistanyň bilim ojaklary bilen hyzmatdaşlyga uly baha berýändigini hem-de ekologik bilim, howa meseleleri we durnukly ösüş ulgamyndaky geljegi uly başlangyçlary yzygiderli goldaýandygyny aýratyn belledi.
I.Wolynkin öz ýüzlenmesinde şeýle çäreleriň ekologik medeniýeti, dostlugy we halkara hyzmatdaşlygy berkitmäge ýardam edýändigini, ýaşlary bolsa haýyrly hem-de peýdaly taslamalara ruhlandyrýandygyny nygtady.
