26-njy awgustda Merkezi Aziýanyň Sebitleýin ekologiýa merkeziniň Türkmenistandaky taslama edarasynyň direktory Mergen Kepbanow Täjigistan Respublikasynyň Adatdan daşary we Doly ygtyýarly ilçisi Niýatbekzoda Wafo Alibek bilen duşuşyk geçirdi. Söhbetdeşligiň dowamynda taraplar daşky gurşawy goramak we howanyň üýtgemegi ulgamynda sebitara hyzmatdaşlygyň häzirki ýagdaýy hem-de geljegi barada pikir alyşdylar.
Mergen Kepbanow diplomaty taslama edarasynyň Türkmenistandaky işiniň esasy ugurlary we durmuşa geçirilen başlangyçlar bilen jikme-jik tanyşdyrdy. Howa meseleleriniň çäklerinde, aprel aýynda Astanada geçirilen Howanyň üýtgemegi boýunça 8-nji Merkezi Aziýa maslahatynyň hünär derejesindäki gepleşikler we sebit ýurtlarynyň ekologiýa kynçylyklaryna uýgunlaşmagy üçin netijeli meýdança bolup hyzmat edendigi bellenildi.
Gepleşikleriň aýratyn bölegi ýaş hünärmenleri taýýarlamak meselesine bagyşlandy. Edaranyň direktory Daşkentdäki «Green University» (Ýaşyl uniwersitet) bilen hyzmatdaşlyk we Merkezi Aziýa ýurtlarynyň ýaşlary üçin häzirki zaman ekologiýa hünärleri boýunça okuw maksatnamalary barada gürrüň berdi. Täjigistanyň ilçisi ugurdaş bilimi ösdürmegiň we ýokary hünärli hünärmenleri taýýarlamagyň ähmiýetini goldady.
Duşuşygyň ahyrynda taraplar Merkezi Aziýanyň Sebitleýin ekologiýa merkeziniň wekilleriniň Täjigistanyň Aşgabatdaky ilçihanasy tarapyndan guraljak çärelere gatnaşmak mümkinçiliklerine seretdiler we yzygiderli maglumat alyşmagy goldamaga hem-de amaly hyzmatdaşlygy giňeltmäge taýýardyklaryny tassykladylar.
