Düýn — 18-nji dekabrda her ýylyň 10-njy dekabrynda bellenilýän Halkara adam hukuklary gününiň çäginde Ýewropa Bileleşiginiň Türkmenistandaky wekilhanasy Türkmenistanyň Döwlet, hukuk we demokratiýa instituty hem-de Türkmenistanyň Adalatçysynyň diwany bilen bilelikde adam hukuklarynyň gymmatlyklaryny wagyz etmäge gönükdirilen jemgyýetçilik çäresini gurady.
Çäre adam hukuklary babatdaky möhüm meseleleri açyk we netijeli ara alyp maslahatlaşmak üçin Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň we Magtymguly adyndaky Türkmen döwlet uniwersitetiniň talyplaryny, şeýle hem milli we halkara guramalaryň wekillerini bir ýere jemledi.
Jemgyýetçilik forum-çekişmeler formatyny ulanmak arkaly gatnaşyjylar üç tapgyrda jemgyýetçilik ähmiýetli temalar boýunça «tarapdary» we «garşy» delilleri getirdiler. Täsirli çekişmeler «Emeli aň we adam hukuklarynyň goralmagy», «Howanyň üýtgemegi XXI asyrda adam hukuklaryna abanýan iň uly wehim hökmünde» we «Bilimde inklýuziwlik» ýaly meseleleri öz içine aldy.
Çekişmeler tankydy pikirlenmäni, ynandyryjy delillendirmek we logiki pikirlenmek endiklerini ösdürmäge, şeýle hem ýaşlaryň arasynda hormat bilen ara alyp maslahatlaşmak medeniýetini we raýat işjeňligini kemala getirmäge gönükdirildi. Düzümine Ýewropa Bileleşiginiň Türkmenistandaky wekilhanasynyň, milli edaralaryň we halkara guramalaryň wekilleri giren köpugurly eminler topary toparlara delillendirmegiň hili, suhangöýlik ussatlygy, toparlaýyn iş we çekişmeleri alyp barmagyň medeniýeti boýunça baha berdi.
Adam hukuklarynyň gününiň bellenilmeginiň çäginde ýaýbaňlandyrylan çekişmeler ýaşlaryň adam hukuklarynyň döwrebap meseleleri barada oýlanmaklary, şeýle hem häzirki zaman dünýäsinde olary goramagyň we öňe sürmegiň ýollary baradaky dialoga işjeň gatnaşmaklary üçin möhüm meýdança öwrüldi.