Şu gün — 22-nji sentýabrda Türkmenistanyň Mejlisinde Birleşen Milletler Guramasynyň Çagalar gaznasynyň halkara geňeşçisi Dessilawa Iliýewa bilen Mejlisiň wekilleriniň arasynda duşuşyk geçirildi.
Duşuşygyň barşynda ýurdumyzda çagalaryň durmuş taýdan goraglylygyny üpjün etmek boýunça alnyp barylýan giň gerimli işler barada pikir alşyldy, şeýle hem ÝUNISEF bilen hyzmatdaşlygyň häzirki ýagdaýy we geljekki mümkinçilikleri ara alnyp maslahatlaşyldy.
Taraplar Türkmenistan bilen ÝUNISEF-iň arasyndaky köpýyllyk hyzmatdaşlygyň işjeň we netijeli häsiýete eýedigini kanagatlanma bilen belläp, bu ugurda bilelikdäki işleriň çagalaryň saglygyny goramaga we berkitmäge, hukuklaryny goramaga hem-de doly derejeli ösüşini üpjün etmäge gönükdirilen köp sanly taslamalarda we başlangyçlarda öz beýanyny tapandygyny nygtadylar.
Duşuşygyň dowamynda çagalaryň bähbitlerini goramak, inklýuziw bilimi we çaganyň hukugyny üpjün etmek boýunça hereket edýän Türkmenistanda çagalaryň hukuklaryny durmuşa geçirmek boýunça 2023-2028-nji ýyllar üçin Hereketleriň Milli Meýilnamasynyň ýerine ýetirlişi hem-de milli kanunçylygy kämilleşdirmegiň möhüm ugurlary ara alnyp maslahatlaşyldy.
Milli Parlamentiň wekilleri çaganyň sazlaşykly ösmegi üçin maşgala goldaw bermegiň, çaganyň terbiýelenmeginde we ösmeginde maşgalanyň ornuny ýokarlandyrmagyň ýurdumyzyň döwlet syýasatynyň ileri tutulýan ugurlarynyň biri bolup durýandygyny, bu ugurda hereket edýän «Çaganyň hukuklarynyň döwlet kepillikleri hakynda» Türkmenistanyň Kanunynyň we beýleki kanunçylyk namalarynyň möhüm ähmiýetini bellediler. Şeýle hem Mejlisiň wekilleri ýurdumyzda ilaty durmuş taýdan goramak, bu ugurda hukuk esaslary berkitmek hem-de halkara borçnamalar bilen utgaşyklylykda täze başlangyçlary durmuşa geçirmek ugrunda yzygiderli işleriň alnyp barylýandygyny nygtadylar.
