Mýunhen şäherinde geçirilen «IAA Mobility 2025» awtoulag sergisinde «Audi» kompaniýasynyň täzelenen «Q3» krossoweri tanyşdyryldy. Täze model täsirli dizaýny bilen tapawutlanýar: giň radiator gözenekleri ulagyň özboluşly ýagtylyk çyralary bilen ajaýyp sazlaşygy döredýär. Awtoulagyň yzky bölegi bolsa ilkinji gezek brendiň kompakt tapgyrynda ulanylan täze tehnologiýasy bilen enjamlaşdyrylypdyr — onda LED yşykly zolak we halkalar bilen bezelýän islege bagly sanly OLED yşyklar ornaşdyrylandyr.
«Q3 Sportback» modeliniň ikinji nesli ýolsuz ýerde hereket edýän ulaglaryň tejribesini kupe stilindäki dizaýn bilen utgaşdyrýar: onuň egrelýän üçegi adaty nusga bilen deňeşdirilende, 29 mm pesdir. LED çyralary ýokary öwüşginli yşyklandyrmany üpjün edýär we akylly sürüji kömekçileri bilen utgaşykly işleýär. 23 mümkinçilikden ybarat gündizki sanly çyralar ýol ýagdaýlarynda awtoulagyň has aýdyň tanalmagyny üpjün edýär.
Salonda rulda ýerleşdirilen dolandyryş paneli, boşadylan merkezi konsol we giňişligi duýmak mümkinçiligini döredýän täze interfeýs bar. Ruluň astyndaky düwmeler geçiriş, yşyklandyrma we aýna süpürijileri dolandyrýar. Kompakt klas üçin niýetlenen akustiki aýnalar ýokary tizlikde hem ses izolýasiýasyny gowulandyrýar.
488 litrlik ýük bölümi oturgyçlaryň ýatyrylmagy bilen 1386 litre çenli giňeýär («Sportback» modelinde — 1289 litr). Oturgyçlar uzynlyk we burç boýunça sazlanyp bilner. «Q3» modeli 2100 kilograma çenli tirkeg çekmäge hem ukyplydyr. Onda hereketlendirijileriň iki görnüşi — 1,5 litrlik TFSI 110 kWt kuwwatly ýeňil gibrid ulgam bilen hödürlenýän nusga, şeýle hem 2,0 litr TDI 110 kWt dizel hereketlendirijisi bar. Elektrik togunda zarýad alýan gibrid ulgamy 200 kWt çenli kuwwat berýär, onuň 25,7 kWt•s batareýasy diňe elektrik togy bilen 119 kilometre çenli ýol geçmäge mümkinçilik döredýär.
Ulagyň asma ulgamy rahatlygy üpjün etmek üçin uýgunlaşdyrylsa, kömekçi ulgamlar sürüjiniň ýadawlygyny yzarlaýar, duralga tapmakda we yza sürmekde ýardam edýär.