«Huawei» kompaniýasy täze nesliň akylly sagady bolan «Watch GT 7 Pro» modelini resmi ýagdaýda tanyşdyrdy. Enjamlaýyn taýdan täze model özünden öňki nusgasyny diýen ýaly gaýtalaýar, esasy üýtgeşmeler bolsa onuň daşky dizaýnynda we programma mümkinçiliklerinde amala aşyryldy.
Sagadyň korpusy titandan ýasalyp, ol sapfir aýnasy we keramiki arka gapagy bilen enjamlaşdyrylandyr. Şunuň bilen birlikde, «Huawei» reňk öwüşginlerini hem täzeledi (kümüşsöw reňkli görnüşi indi ýaşyl ýa-da sary reňk utgaşmalary bilen elýeterli), sagadyň kemeri bolsa gündelik ulanmak üçin has amatly bolar ýaly täzeden işlenip düzüldi.
Enjama gurlan datçikler toplumy ýürek urşuny (puls), gandaky kislorodyň mukdaryny («SpO2») we deri gyzgynlygyny ölçemäge mümkinçilik berýär. Şeýle hem sagat «5ATM» derejesinde suwdan goraglylyga eýedir.
Öndüriji sagadyň iň az agramlylykda 21 güne çenli, adaty ulanyşda takmynan 12 gün, hemişe işjeň ekran tertibinde («Always-On Display») bolsa 7 güne çenli işlejekdigini wada berýär. Şeýle hem enjamda «Bluetooth 6.0», «GPS», «NFC» ulgamlary, gurlan dinamik we mikrofon bar.
Mundan başga-da, kompaniýa welosipedçiler, golfçular we ylgawçylar üçin sport tertiplerini täzeledi — indi statistika we funksionallyk has-da giňeldildi. Hytaýda «Huawei Watch GT 7 Pro» eýýäm satuwa çykaryldy, onuň bahasy 2688 ýuan (takmynan 399 dollar) möçberindedir.
