Türkmenistanyň Prezidenti Serdar Berdimuhamedow 15-nji oktýabrda Aziýada hyzmatdaşlygy we ynanyşmagy berkitmegiň çäreleri Geňeşiniň nobatdaky sammitine gatnaşmak üçin sapar bilen Azerbaýjan Respublikasyna bardy.
Geýdar Aliýew adyndaky Halkara howa menzilinde Türkmenistanyň Prezidentini Azerbaýjanyň Premýer-ministriniň orunbasary Şahin Mustafaýew we beýleki resmi adamlar garşyladylar.
Sammitiň dowamynda CICA-ny mundan beýläk-de ösdürmek meselesi, şol sanda onuň Ýewraziýa giňişligindäki köptaraplaýyn hyzmatdaşlygyň umumy ulgamyndaky orny ara alnyp maslahatlaşylar. Çäräniň gün tertibine yklymda ynamy, parahatçylygy we howpsuzlygy berkitmek, Maslahaty institut taýdan ösdürmek, şeýle hem ulag arabaglanyşygy, sanlaşdyrma we durnukly ykdysady ösüş ugurlarynda amaly hyzmatdaşlygy pugtalandyrmak meseleleri girizilendir.
