Şu gün — 26-njy oktýabrda Madridiň «Real» topary Ispaniýanyň La Ligasynyñ 10-njy tapgyrynda öz meýdançasynda «Barselonany» kabul etdi. Duşuşyk Madridiň «Santiago Bernabeu» stadionynda geçirildi we 2:1 hasabynda ýer eýeleriniñ peýdasyna tamamlandy.
Oýnuň 21-nji minutynda «Realyñ» fransiýaly hüjümçisi Kilian Mbappe derwezeçi bilen bire-bir çykyp gol geçirdi we toparyny öňe çykardy. 38-nji minutda «Barselona» toparynyň oýunçysy Fermin Lopes dürs urgusy bilen hasaby deňledi.
Şondan bäş minut soňra «Real» topary garşydaşyň jerime meýdançasynda netijeli hereket edip öňe çykdy — bu gezek ýarymgoragçy Jud Bellingem (43-nji minut) tapawutlandy.
52-nji minutda «Barselonanyň» derwezeçisi Woýseh Şesny Kilian Mbappeniň penaltisini saklady.
Oýnuň 90+10-njy minutynda «Barselonanyň» ýarymgoragçysy Pedri ikinji sary karty alyp, meýdançadan çykaryldy.
Şeýdip, «Real» soňky bäş «el klasiko» duşuşygynda ilkinji ýeňşini gazandy. Madridiň topary soňky gezek «Barselonany» 2024-nji ýylyň aprel aýynda ýeňipdi.
Bu ýeňişden soň «Real» 27 utuk toplap, La Liganyň ýaryş tertibinde eýeleýän birinji ornuny berkitdi. «Barselona» bolsa 22 utuk bilen ikinji ýerde galdy.
