Madridiň «Realy» Çempionlar Ligasynyň ikinji tapgyrynda Gazagystanyň «Kaýrat» toparyny uly hasap bilen ýeňdi. Almaty şäherinde geçirilen duşuşyk 5:0 hasabynda tamamlandy.
Ýyldyz hüjümçi Kilian Mbappe het-trik bilen tapawutlandy (25-nji minutda penaltiden, 52-nji we 74-nji minutlarda).
Ýene-de ýarymgoragçy Eduardo Kamawinga (83-nji minut) we hüjümçi Braim Dias (90-njy minut) bir topdan öz atlaryna ýazdyrdylar. Mbappeniň ikinji golunda «Realyň» derwezeçisi Tibo Kurtuanyň ýardam (assist) pasyny geçirendigi aýratyn bellärliklidir.
Habi Alonsonyň topary 22-nji oktýabrda geçirijiljek üçünji tapgyrda Turiniň «Ýuwentusyny» kabul eder, «Kaýrat» bolsa bir gün öň öýünde Kipriň «Pafos» topary bilen duşuşar.
