Ispaniýanyň Superkubogynyň final duşuşygynda «Barselona» Madridiň «Realynyň» garşysyna çykdy. Oýun Saud Arabystanynyň Jidda şäherindäki «King Abdulla Sports Siti» stadionynda geçirildi. Hose Munuera Montero duşuşygyň baş emini hökmünde çykyş etdi. Oýun 3:2 hasabynda katalonlylaryň ýeňşi bilen tamamlandy.
36-njy minutda braziliýaly Rafinýa «Barselonany» öňe saýlady. Birinji ýarymyň goşmaça wagtynda — 45+2-nji minutda bolsa «Realyň» wingeri Winisius Žunior hasaby deňledi. Şondan iki minut hem geçip-geçmänkä — 45+4-nji minutda hüjümçi Robert Lewandowski katalonlaryň ikinji goluny geçirdi. Bu hasap hem bary-ýogy iki minutlap dowam etdi. 45+6-njy minutda Gonsalo Garsiýa ýene-de hasaby deňledi. 73-nji minutda Rafinýa özüniň ikinji goluny geçirip, dubl etdi.
90+1-nji minutda katalonlylaryň ýarymgoragçysy Frenki de Ýong gyzyl kart alyp, meýdançadan çykaryldy.
Şeýlelikde, «Barselona» taryhda 16-njy gezek ýurduň Superkubogyny eýeledi. Ýeri gelende ýatlasak, geçen ýylky ýaryşyň finalynda hem Katalonyň kluby «Realy» 5:2 hasabynda ýeňipdi.
