Portugaliýanyň futbol boýunça milli ýygyndy toparynyň kapitany Kriştianu Ronaldu «X» sosial ulgamynda söweş sungatlarynyň garyşyk görnüşi (MMA) boýunça ispan promouşeni — «WOW FC-niň» paýdary bolandygyny habar berdi.
Bu guramanyň esaslandyryjysy «UFC-niň» ýeňil agramdaky çempiony, ispan-gruzin söweşijisi Iliýa Topuriýadyr.
«WOW» iňlis dilindäki «The Way of Warrior» jümlesiniň baş harplaryndan emele gelýär, ol «Söweşijiniň ýoly» diýmegi aňladýar. Bu promouşen öz ýaryşlaryny Ispaniýada geçirýär.
«Biz meniň ýürekden ynanýan gymmatlyklarymy — tertip-düzgüni, hormaty, berkligi we kämillige üznüksiz ymtylmagy paýlaşýarys. «WOW FC» aýratyn we güýçli bir zady döredýär, men bolsa bu taslama goşulanyma buýsanýaryn. Maksadym — garyşyk söweş sungatyny täze derejä çykarmaga we indiki nesle ruhlandyryjy itergi bermäge ýardam etmek» — diýip, Ronaldu jemgyýetçilik torlarynda ýazdy.
Kriştianu Ronaldu özüniň garyşyk söweş sungatyna gyzyklanmasynyň uludygyny birnäçe gezek belläp geçipdi. Mysal üçin, Ronaldu Saud Arabystanynda geçirilen «UFC» ýaryşyna baryp görüpdi, şondan öň bolsa Şara Bullet bilen duşuşypdy. Portugaliýaly ýyldyz köp sanly söweşijiniň sosial ulgamlaryna agza boldy we olaryň karýeralaryny yzygiderli yzarlap durýar. Şeýle hem onuň Habib Nurmagomedow bilen dostlukly gatnaşyklary bar. Şonuň üçin hem, futbol ýyldyzynyň MMA-promouşenine maýa goýmagy doly düşündirip boljak ýagdaýdyr.
