Türkmenistanyň 20 ýaşa çenli ýaşlar ýygyndysy «Aziýanyň Kubogy –2027-niň» saýlama tapgyryndaky çykyşyna ýeňiş bilen başlady. Duşuşyklary Tailandyň Çonburi şäherinde geçirilýän «F» toparçanyň ilkinji duşuşygynda türkmen futbolçylary Yragyň ýygyndysyndan 2:1 hasabynda üstün çykdylar. Aziýanyň Futbol konfederasiýasynyň resmi saýty Türkmenistanyň ýygyndysynyň bu ýeňşini garaşylmadyk netije hökmünde häsiýetlendirdi.
Duşuşykda hasap 15-nji minutda açyldy. 11 metrlik jerime urgusyny takyk ýerine ýetiren Ýakupmuhammet Gowşudow türkmen ýygyndysyny öňe çykarmagy başardy. Ikinji ýarymda yrakly futbolçylar hasaby deňlemegiň hötdesinden geldiler. 59-njy minutda Moamel Malik Sabah Alşawi güýçli hem-de takyk urgy bilen topy derwezeden geçirdi.
Muňa garamazdan, türkmen futbolçylary ýene öňe çykmagyň hötdesinden geldiler. 77-nji minutda Weýisgeldi Orazdurdyýew türkmen toparynyň ýeňiş goluny derwezä gönükdirdi.
«F» toparynyň beýleki duşuşygynda ýaryşyň eýesi bolan Tailandyň ýygyndysy BAE-niň toparyndan 1:0 hasabynda üstün çykdy. Ýeke-täk gol goşmaça wagtyň ilkinji ýarymyna goşulan minutlarynda Siwakorn Ponsan tarapyndan geçirildi.
Türkmenistanyň ýaşlar ýygyndysy nobatdaky oýnuny şu gün — 3-nji sentýabrda Tailandyň ýygyndysyna garşy geçirer. 6-njy sentýabrda bolsa BAE-niň ýygyndysy bilen duşuşar.
