Aşgabatda saýlama ýaryş tamamlandy we halkara derejede ýurdumyza wekilçilik etjek iň güýçli bäş küştçiniň ady kesgitlenildi. 17–22-nji mart aralygynda Türkmenistanyň ähli künjeklerinden gelen ýaş zehinleriň 49-sy türki döwletleriň arasynda geçiriljek taryhy olimpiada (U16) gatnaşmak hukugy ugrunda göreşdi.
Ýaryşyň aýratynlygy ýaş toparlarynyň (12 we 14 ýaşa çenli) wekilleriniň üstünlikli çykyş etmegidir. Bu bolsa ýurtda çagalar küştüni ösdürmek boýunça maksatnamalaryň netijeliligini tassyklaýar.
Dokuz tapgyryň netijeleri boýunça milli ýygyndynyň düzümine Aly Ahmedow, Ahmet Artykow, Gurbanmyrat Rustemow, şeýle hem gyzlaryň arasynda iň gowy netijäni görkezen Zalina Iminowa girdi. Iň uly garaşylmadyk netije bolsa Dilber Hupbyýewanyň çykyşydyr — ol oglanlar bilen deň derejede bäsleşip, hormatlyk dördünji orny eýeledi.
Türki döwletleriň arasynda ilkinji küşt olimpiadasy 13–18-nji maý aralygynda Gazagystanyň Türküstan şäherinde geçiriler. Türkmen küştçülerine Türkiýe, Azerbaýjan, Özbegistan, Gazagystan we Gyrgyzystan döwletleriniň iň güýçli kütçüleri bilen duşuşyklar garaşýar.
