Türkmenistanly mekdep okuwçy gyzlary 1–7-nji awgust aralygynda Beýik Britaniýada geçirilen "XPERTSTEM Elite Final Competition" halkara bäsleşiginde ýokary netijeleri görkezdiler. Bu bäsleşige dünýäniň dürli ýurtlaryndan zehinli wekiller gatnaşdy.
Aşgabadyň Türkmen-türk ortak orta mekdebiniň 13 ýaşly okuwçysy Akgözel Perhadowa "Programmirleme" ugry boýunça altyn medala mynasyp boldy. Ol çylşyrymly tehnologiki wezipeleri çözmekde çuňňur bilimini, seljeriş ukybyny we özboluşly çemeleşmesini görkezdi.
"Iňlis dili" ugry boýunça bürünç medallara Mary welaýatynyň 16-njy ýöriteleşdirilen mekdebiniň okuwçysy Aýnur Ýagmyrowa, paýtagtymyzyň 15-nji orta mekdebiniň okuwçysy Mariýa Ruslanowa we Lebap welaýatynyň Türkmenabat şäherindäki 2-nji ýöriteleşdirilen mekdebiniň okuwçysy Jennet Halbaýewa mynasyp boldular.
Ýurdumyzyň ýaş wekilleriniň bu şowly çykyşy zehinli ýaşlary goldamak we döwrebap bilim ugurlaryny özleşdirmek boýunça alnyp barylýan işleriň netijeliligini görkezýär. Okuwçy gyzlaryň bu üstünlikleri ýokary derejeli taýýarlygyň nusgasy bolup hyzmat edýär we olaryň deň-duşlaryny täze okuw ýeňişlerine ruhlandyrýar.
