Aşgabatda «Kids Expo: ähli zat çagalar üçin» atly halkara sergi-ýarmarkasy geçirilýär. Bu sergi çagalar harytlary, bilim we dynç alyş ulgamynda işleýän türkmen hem daşary ýurt kompaniýalarynyň arasyndaky gepleşikler üçin netijeli meýdança öwrüldi. Şeýlelikde, Russiýanyň «Soýuzmultfilm» kinostudiýasy forumyň esasy myhmanlarynyň biri boldy.
Studiýanyň ygtyýarnamalar boýunça bölüminiň ýolbaşçysy Ýuliýa Golowa «Türkmenistan: Altyn asyr» elektron gazetiniň habarçysy bilen söhbetdeşlikde sebitdäki ornuny giňeltmek boýunça meýilnamalaryny we paýtagt baradaky täsirlerini paýlaşdy.
Kinostudiýa türkmen öndürijilerine «Altyn kolleksiýanyň» gahrymanlaryny, şeýle hem täze animasion taslamalaryny ulanmak arkaly çagalar önümlerini bilelikde öndürmegi teklip edýär. Gahrymanlary ýerli önümçilige ornaşdyrmak maksady bilen, Aşgabatda birnäçe B2B duşuşyklary meýilleşdirildi.
Häzirki wagtda studiýanyň multfilmlerini Türkmenistanyň kinoteatrlarynyň uly ekranlarynda görkezmek barada gepleşikler alnyp barylýar. Öz gezeginde, «Soýuzmultfilm» kinostudiýasy «Turkmen Expo» kompaniýasynyň goldawy bilen türkmen multiplikatorlaryny Russiýada geçirilýän ugurdaş festiwallara gatnaşmaga çagyrýar.
Studiýanyň wekili dil bökdençliginiň bolmazlygynyň we Türkmenistanda sowet nusgawy multfilmleriniň meşhurlygynyň işewürlik gatnaşyklaryny ýola goýmagy ep-esli ýeňilleşdirýändigini hem-de täze nesli brendler bilen tanyşdyrmaga kömek edýändigini aýratyn belledi.
Söhbetdeşligiň ahyrynda Ýuliýa Golowa Aşgabada ilkinji gezek gelendigini aýtdy we ony «gözüňi gamaşdyryjy ak reňkli, sazlaşykly binagärligi bolan, ertekilerdäki ýaly arassa şäher» diýip häsiýetlendirdi hem-de türkmen halkyna bagt we gülläp ösüş arzuw etdi.
