Amerikanyň Birleşen Ştatlarynda Prezidentiň 2025-nji ýylyň iýunyndaky beýannamasy esasynda girizilen Türkmenistanyň raýatlarynyň immigrasiýa degişli bolmadyk wizalaryň sanawy boýunça ýurda girmegine degişli çäklendirmeler ýatyryldy. Degişli çözgüt Ak tamyň 2025-nji ýylyň dekabrynda täzelenen beýannamasynda berkidildi.
Resminamada bellenilişi ýaly, geçen döwürde Türkmenistan şahsyýeti anyklaýyş maglumatlaryny dolandyrmak we maglumat alyşmak babatda möhüm öňegidişlik görkezdi, şeýle hem howpsuzlyk we migrasiýa gözegçiligi meseleleri boýunça amerikan tarapy bilen netijeli hyzmatdaşlygy ýola goýdy. Şunuň bilen baglylykda, ozal hereket eden çäklendirmelere gaýtadan seredildi we olar gowşadyldy.
Haýsy wizalar ýene-de elýeterli
Täze beýannama laýyklykda, Türkmenistanyň raýatlarynyň immigrasiýa degişli bolmadyk aşakdaky wizalar boýunça ABŞ-nyň çägine girmegine girizilen wagtlaýyn çäklendirmeler doly ýatyryldy:
B-1 (işewürlik wizasy)
Bu wiza işe ýerleşmek hukugy bolmazdan, gepleşiklere, maslahatlara, işewürlik duşuşyklaryna we beýleki täjirçilik çärelerine gatnaşmagy öz içine alýan gysga möhletli iş saparlary üçin niýetlenendir.B-2 (syýahatçylyk wizasy)
Syýahatçylyk saparlary, garyndaşlaryňda bolmak, saglyk bejergisini almak we beýleki şahsy maksatlar üçin berilýär.B-1/B-2 (utgaşdyrylan wiza)
Saparyň işewürlik we syýahatçylyk maksatlaryny utgaşdyrmaga mümkinçilik berýän we iň giňden ýaýran dereje.F (talyp wizasy)
ABŞ-nyň akkreditirlenen okuw mekdeplerinde, şol sanda uniwersitetlerde, kollejlerde we dil öwreniş mekdeplerinde bilim almak üçin berilýär.M (professional okuw wizasy)
Akademiki bilime degişli bolmadyk tehniki we hünär maksatnamalary boýunça bilim almak üçin ulanylýar.J (alyş-çalyş maksatnamalarynyň wizasy)
Tejribelikleri, ylmy barlaglary, akademiki saparlary we medeni taslamalary goşmak bilen, bilim hem hünär alyş-çalyş maksatnamalarynyň giň gerimini öz içine alýar.
Çäklendirmeleriň ýatyrylmagy Türkmenistanyň raýatlarynyň görkezilen wiza derejeleri boýunça ýene-de ýüz tutup (arza tabşyryp) we wagtlaýyn bolmak üçin ABŞ-nyň çägine adaty tertipde girip biljekdiklerini aňladýar.
ABŞ-da hemişelik ýaşamak üçin niýetlenen immigrasiýa wizalaryna, şol sanda «Green Card» mümkinçiligine girizilen çäklendirmeler bolsa häzirlikçe saklanyp galýar.