Aşgabat şäherindäki Ýöriteleşdirilen küşt we şaşka mekdebinde küşt boýunça Türkmenistanyň çempionaty — Ýokary liga badalga aldy.
Ýaryş iki derejede — açyk (erkekler) görnüşde we zenanlaryň arasynda geçirilýär. Çempionata milli ýaryşlaryň netijeleri boýunça saýlanyp alnan ýurduň iň güýçli 16 küştçüsi (her derejede 8 adam) gatnaşýar.
Bu çempionat şu ýylyň sentýabr aýynda Samarkantda (Özbegistan Respublikasy) geçirilmegi meýilleşdirilýän 47-nji Bütindünýä küşt olimpiadasynda ýurdumyza wekilçilik etjek milli ýygyndy toparyň düzümini kesgitlemegiň esasy tapgyrydyr.
Saýlama düzgünnamasyna laýyklykda, Saparmyrat Atabaýew (2487) we Meýlis Annaberdiýew (2424) bu ýaryşa gatnaşmazdan, reýtingleri boýunça ýurdumyzyň erkekler ýygyndysynyň düzümine goşuldy. Milli ýygyndydaky galan üç orun açyk derejedäki çempionatyň netijeleri boýunça kesgitlener.
Zenanlar ýygyndymyza bolsa zenanlaryň milli reýtinginiň öňdebaryjysy Leýla Şöhradowa (2182) göni goşuldy. Olimpiýa ýygyndynyň beýleki agzalary çempionatdaky çykyşlarynyň netijelerine görä saýlanar.
Ýokary liganyň gatnaşyjylary. Açyk dereje:
Wepaly Halynyýazow — 2025-nji ýylyň Ýokary ligasynyň ýeňijisi, reýtingi — 2194;
Ahmet Gubataýew — 2025-nji ýylyň Federasiýa kubogynyň kümüş baýrakçysy, reýtingi — 2176;
Amanmuhammet Hommadow — 2025-nji ýylyň Gran-pri ýaryşlar tapgyrynyň ýeňijisi, reýtingi — 2269;
Gurbanmyrat Rüstemow — 2026-njy ýylyň Birinji ligasynyň ýeňijisi, reýtingi — 2148;
Ilhan Çaryýew — 2026-njy ýylyň Birinji ligasynyň kümüş baýrakçysy, reýtingi — 2187;
Şahruh Turaýew — 2026-njy ýylyň Birinji ligasynyň bürünç baýrakçysy, reýtingi — 2211;
Karen Grigorýan — halkara ussat, 2026-njy ýylyň Birinji ligasynda dördünji orny eýeledi, reýtingi — 2216;
Leýla Şohradowa — saýlamanyň netijesi boýunça Ýokary liganyň gatnaşyjysy (Birinji ligada 5-nji orun), reýtingi — 2182.
Ýaryşyň iň ýaşuly gatnaşyjysynyň 72 ýaşly halkara ussat Karen Grigorýandygyny aýratyn bellemek gerek. Ol Ýokary liga diňe sport ýörelgesi esasynda, Birinji liganyň ähli tapgyrlaryndan geçip, hiç hili «wild card» (ýörite çakylyk) almazdan saýlandy.
Ýokary liganyň gatnaşyjylary. Zenanlar derejesi:
Jahan Rejepowa — 2025-nji ýylyň Ýokary ligasynyň çempiony, reýtingi — 2051;
Lala Şöhradowa — Ýokary liganyň gatnaşyjylarynyň arasynda iň ýokary reýtinge eýe, reýtingi — 2109;
Gülmira Seýilhanowa — gyzlaryň arasynda Federasiýa kubogynyň kümüş medalçysy, reýtingi — 1810;
Ogulsuraý Baýrambaýewa — zenanlaryň arasynda TŞF-nyň Gran-pri ýaryşlar tapgyrynyň kümüş medalçysy, reýtingi — 1906;
Dilber Hupbyýewa — 2026-njy ýylyň Birinji ligasynyň ýeňijisi, reýtingi — 1916;
Mähri Agamyradowa — 2026-njy ýylyň Birinji ligasynyň kümüş medalçysy, reýtingi — 1925;
Aýşe Gubataýewa — 2026-njy ýylyň Birinji ligasynyň bürünç medalçysy, reýtingi — 1908;
Mährijemal Gurbangeldiýewa — 2026-njy ýylyň Birinji ligasynda dördünji orny eýelän gatnaşyjy, reýtingi — 1939.
Ýokary liganyň statistikasy:
Açyk dereje:
ortaça reýting — 2198;
ortaça ýaş — 27;
iň ýaşuly gatnaşyjy — 72 ýaş (Karen Grigorýan);
iň ýaş gatnaşyjy — 16 ýaş (Gurbanmyrat Rüstemow).
Zenanlar derejesi:
ortaça reýting — 1946;
ortaça ýaş — 18;
iň uly gatnaşyjy — 23 ýaş;
iň kiçi gatnaşyjy — 12 ýaş (Dilber Hupbyýewa).
Küşt boýunça Türkmenistanyň çempionaty (Ýokary liga) 11-nji fewrala çenli dowam eder we ýurduň milli ýygyndy toparlarynyň gutarnykly düzümini kesgitlär.
