Halkara ynsanperwer ylymlary we ösüş uniwersitetiniň talyby Jumamyrat Batyrow GDA ýurtlarynyň zehinli ýaşlarynyň arasynda geçirilýän halkara bäsleşigiň jemleri boýunça «GDA-nyň iň gowy talyby» diýen abraýly ada mynasyp boldy.
Abraýly baýrak «Žana Gazagystan» Milli innowasion ylmy-barlag merkezi tarapyndan guralan halkara bäsleşigiň çäklerinde gowşuryldy. Bäsleşigiň baş maksady GDA ýurtlarynyň ýokary okuw mekdeplerinde bilim alýan, ýokary okuw görkezijilerini, ylmy-barlag işjeňligini, jemgyýetçilik işlerine goşandyny we ýolbaşçylyk ukyplaryny görkezýän iň zehinli ýaşlary ýüze çykarmakdan ybaratdyr.
Jumamyrat Batyrow Halkara ynsanperwer ylymlary we ösüş uniwersitetiniň iň işjeň talyplarynyň we meýletinçileriniň biri hökmünde tanalýar. Ol okuw döwründe uniwersitetde geçirilýän ylmy-amaly maslahatlara, halkara çärelere, medeni-köpçülikleýin we jemgyýetçilik taslamalaryna, şeýle hem meýletinçilik hereketlerine işjeň gatnaşyp, özüniň jogapkärçiligini, guramaçylyk ukybyny we ýokary raýat işjeňligini birnäçe gezek subut etdi.
Bu halkara sylagy talybyň diňe bir şahsy üstünligi däl, eýsem, Halkara ynsanperwer ylymlary we ösüş uniwersitetinde alnyp barylýan ýokary hilli bilim-terbiýe işleriniň, ýaşlaryň ylmy, döredijilik we jemgyýetçilik başlangyçlaryny goldamak boýunça amala aşyrylýan netijeli işleriň hem nobatdaky ykrarnamasy bolup durýar.
