21 – 25-nji iýul aralygynda Indoneziýanyň paýtagty Jakarta şäherinde FIFA-nyň iş maslahaty geçirildi. Ýurtlaryň 12-sinden 24 wekiliň gatnaşmagynda geçirilen iş maslahatyna ýurdumyzdan Türkmenistanyň Futbol federasiýasynyň baş sekretary Serdar Geldiýew we tehniki direktory Röwşen Meredow wekilçilik etdiler.
Maslahat FIFA-nyň tehniki liderleriniň başlygy Jamie Houçen we tehniki ösüş hyzmatlarynyň başlygy Jurg Nepferiň ýolbaşçylygynda geçdi. Onda çykyş edenleriň ählisi ilki bilen futbolda işleri tehniki taýdan kämil guramaga ünsi çekdiler. Şonuň bilen birlikde, futbol taslamasyny uzak möhletleýin meýilleşdirmek, ýolbaşçylyk ukyplary ösdürmek, halkara derejesinde iş tejribesini alyşmak ýaly zerur temalaryň üstünde giňişleýin durup geçdiler.
Bu seminar FIFA-nyň dünýä jemgyýetçiliginde futboly ösdürmekdäki üstünlikli ädimleriniň ilerleýändiginiň nobatdaky subutnamasydyr.
