Aşgabat şäherindäki ýöriteleşdirilen 7-nji orta mekdebiň 11-nji synp okuwçysy Batyr Soltanow Moskwada her ýyl geçirilmesi asylly däbe öwrülen rus dili boýunça XXI halkara olimpiadada üçünji orna eýe boldy. W.G.Kostomarow adyndaky halkara olimpiada daşary ýurtly mekdep okuwçylarynyň gatnaşmagynda ýaýbaňlandyrylýar.
A.S.Puşkin adyndaky Döwlet rus dili instituty, «Rus dünýäsi» gaznasy tarapyndan Russiýa Federasiýasynyň Daşary işler ministrliginiň hem-de Halkara rus dili we edebiýaty mugallymlary assosiasiýasynyň goldawy esasynda guralan bu olimpiada halkara aragatnaşyk dili hökmünde rus diliniň ornuny pugtalandyrmaga gönükdirilen iň abraýly bäsleşikleriň biridir.
Çynlakaý onlaýn saýlama tapgyryndan soň, 22 ýurtdan bolan 27 finalçy Moskwa gelip, jemleýji tapgyra gatnaşdy. Batyr Soltanow Puşkin institutynyň binasynda ýazmaça we dilden geçirilen ähli synaglardan üstünlikli geçip, Türkmenistanda alan bilimleriniň ýokary derejesini görkezmegi başardy. Şeýle hem ähli gatnaşyjylar üçin öňdebaryjy hünärmenleriň gatnaşmagynda ussatlyk sapaklary hem-de giň gerimli medeni-bilim maksatnamasy guraldy.
Sylaglamak dabarasynda türkmen wekiliýeti ýörite diplomlaryň ýene biri bilen sylaglandy. Milli topar A.S.Puşkin institutynyň esaslandyryjysy we görnükli dilçi Witaliý Kostomarowyň 95 ýyllygyna bagyşlanyp döredilen ýörite diploma eýe boldy. Sylagy ýaş watandaşymyz Aýlar Ataýewa kabul etdi.
