10-njy fewralda «Россия сегодня» halkara habarlar agentliginde 2026-njy ýylda Türkmenistanyň Garaşsyz Döwletleriň Arkalaşygyndaky başlyklygynyň çäklerinde maglumat alyş-çalşygy meselelerine bagyşlanan iş duşuşygy geçirildi. Bu barada GDA-nyň Ýerine ýetiriji komitetiniň metbugat gullugy habar berýär.
Maslahata «Россия сегодня» halkara habarlar agentliginiň baş redaktorynyň orunbasary, Ýakyn daşary ýurtlardaky we Baltika ýurtlaryndaky «Sputnik» multimedia merkezleriniň müdiriýetiniň direktory Andreý Blagodyrenko, Türkmenistanyň Russiýa Federasiýasyndaky ilçihanasynyň metbugat-attaşesi Gülälek Çopanowa we GDA-nyň Ýerine ýetiriji komitetiniň metbugat gullugynyň ýolbaşçysy Swetlana Malinina gatnaşdy.
Duşuşygyň çäklerinde esasy üns 2026-njy ýylda Türkmenistanyň GDA-da başlyklyk etmeginiň çäginde geçiriljek çäreleri giň gerimde beýan etmekde «Sputnik» habarlar agentliginiň tutýan ornuna gönükdirildi. Taraplar Arkalaşyga agza ýurtlaryň köpçülikleýin habar beriş serişdeleriniň (KHBS) arasyndaky gatnaşyklary pugtalandyrmagyň gurallaryny, bilelikdäki mazmuny döretmegi we bilermenleriň pikir alyşmalaryny ara alyp maslahatlaşdylar. Duşuşyga gatnaşyjylar döredijilikli gün tertibini öňe sürmegiň hem-de halkara giňişliginde GDA-nyň obýektiw we oňyn abraýyny kemala getirmegiň möhümdigini nygtadylar.
Duşuşygyň ahyrynda halklaryň ýakynlaşmagyna ýardam berýän hem-de Türkmenistanyň medeni we ykdysady başlangyçlaryny GDA giňişliginde wagyz edýän bilelikdäki media taslamalaryny durmuşa geçirmäge taýýarlyk bellenildi.
