Türkmenistanyň Prezidenti Serdar Berdimuhamedow Eýran Yslam Respublikasynyň halkyna ynsanperwerlik ýüküni ibermek hakyndaky Buýruga gol çekdi. Bu çäre mukaddes Oraza aýy hem-de Gadyr gijesi mynasybetli amala aşyrylýar.
Ynsanperwer kömegi Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan iberildi. Bu hoşniýetli erk-islegiň nyşany, ilkinji nobatda, goňşy ýurduň ösüp gelýän ýaş nesliniň bagtyýarlygyna gönükdirilendir we dostluk hem-de hoşniýetli goňşulyk ýörelgeleriniň üýtgewsizdiginiň aýdyň subutnamasydyr.
Ynsanperwerlik ýüküniň düzümini derman serişdeleriniň giň sanawy, lukmançylyk maksatly serişdeler we çagalaryň saglygyny hem-de abadançylygyny goldamak üçin zerur bolan beýleki önümler düzýär.
Resminamada bu çäräniň doganlyk we goňşy halklara elini uzatmaga elmydama taýýar bolan türkmen halkynyň asylly däplerine esaslanýandygy hem-de Türkmenistanyň ynsanperwerlik ideallaryna ygrarlydygynyň nyşanydygy aýratyn bellenilýär.
