Ahal welaýatyndaky zawod önüm öndürilişini aýda 1200 tonna çenli, ýagny iki esse artdyryp, gysga wagtyň içinde sebitde sellýuloza-kagyz önümlerini üpjün edýän esasy kärhanalaryň birine öwrüldi. Kärhanada A3 we A4 formatly ofis kagyzlary, şeýle-de dürli dykyzlykdaky kagyz önümleri öndürilýär.
Bu ýerde täze okuw ýylyna çenli mekdep okuw kitaplaryny we depderlerini çap etmek üçin niýetlenen kagyzlaryň öndürilişi hem işjeň artdyrylýar. Önümler diňe içerki bazar üçin däl, eýsem, daşary ýurtlara ugratmaga hem gönükdirilendir. Şu günki günde Azerbaýjan, Ermenistan, Eýran we Özbegistan türkmen kagyzyny satyn alýar, ýakyn geljekde bolsa Gruziýanyň we Gyrgyzystanyň bazarlaryna çykmak meýilleşdirilýär.
Öndürilýän önümler berk tehnologik standartlara doly laýyk gelýär: olar özüniň aşa aklygy, berkligi, ýylmanaklygy we çaphana reňkini birsydyrgyn siňdirip bilmek ukyby bilen tapawutlanýar. Bu häsiýetler mekdepleriň okuw önümleridir gurallary üçin örän möhümdir. Ýokary hil dünýäniň öňdebaryjy öndürijilerinden satyn alynýan premium derejeli sellýuloza arkaly üpjün edilýär.
Kärhanada 125-e golaý işçi zähmet çekýär. Önümçilik göwrümi bir gije-gündizde 60 tonna çenli ýetýär. Tehnologik iş yzygiderliligi tas galyndysyz amala aşyrylýar: kagyz gyryndylarynyň ählisi gaýtadan işlenilmäge gönükdirilýär. Zawodyň meýilnamalarynda onuň gije-gündizlik kuwwatyny 100 tonna ýetirmek we aýda 3000 tonna çenli kagyz öndürmek wezipesi durýar.
