Günorta-Gündogar Aziýa oýunlarynyň çäginde zenanlaryň arasynda geçirilen futbol bäsleşiginiň finalyna eminlik etmek FIFA-nyň türkmenistanly emini Kristina Bersenýowa ynanyldy.
Bäsleşigiň dowamynda birnäçe duşuşykda kömekçi eminiň wezipesini ýerine ýetiren türkmenistanly eminiň görkezen ussatlygyny nazara alan guramaçylar zehinli ildeşimizi Filippinleriň hem-de Wýetnamyň zenanlar ýygyndy toparlarynyň arasynda geçirilen final oýnunda eminiň kömekçisiniň wezipesini alyp barmaga mynasyp hasapladylar.
Tailandyň Çonburi şäherinde geçirilen final duşuşygyň esasy wagty 0:0 hasabynda tamamlandy. Şeýlelikde, duşuşykda oýundan soňky bellenen 11 metrlik urgulary şowly ýerine ýetiren Filippinleriň zenanlar ýygyndy topary baş baýraga mynasyp boldy. Bu duşuşykda awstraliýaly baş emin Rebekka Durkaunyň kömekçileriniň wezipesini Kristina Bersenýowa bilen laosly Çanthawong Phutsawan ýerine ýetirdi.
Şu ýyldan başlap halkara ýaryşlaryna kömekçi emin hökmünde gatnaşyp başlan K.Bersenýowanyň AFK-nyň bäsleşiklerine dördünji gezek çagyrylandygyny bellemek gerek.