Saud Arabystanynyň paýtagty Er-Riýad şäherinde Aziýa futbol konfederasiýasynyň (AFK) milli assosiasiýalarynyň prezidentleriniň we baş sekretarlarynyň Kongresi geçirildi. Üç günlük çärä Türkmenistanyň futbol federasiýasynyň (TFF) başlygy Guwançmuhammet Öwekow we baş sekretary Serdar Geldiýew gatnaşdy.
Kongres tejribe alyşmak, Aziýa futboluny ösdürmek üçin täze strategiýalary işläp düzmek we AFK agza ýurtlaryň arasyndaky hyzmatdaşlygy pugtalandyrmak üçin möhüm meýdança öwrüldi. Açylyş dabarasynda AFK-nyň prezidenti şeýh Salman bin Ibragim Al Halifa konfederasiýanyň agzalaryna minnetdarlyk bildirdi we geçirilen özgertmeleriň ähmiýetini nygtady. Ol Konfederasiýanyň täze topar ulgamyna geçendigini belläp, AFK-nyň esasy maksadynyň milli assosiasiýalaryň ösüşini goldamak we olaryň mümkinçiliklerini açmak bolup durýandygyny tassyklady.
Kongresiň esasy maksady dolandyryş we tehniki menejment ülňülerini ýokarlandyrmakdan ybaratdyr. Şunlukda, birinji gün hyzmatdaşlygy pugtalandyrmak we innowasiýalary ornaşdyrmak meseleleri ara alnyp maslahatlaşyldy, ikinji gün bolsa Aziýa futbolunyň geljegini kesgitleýän durnukly ösüşe we strategiki hyzmatdaşlyga bagyşlanan «Kommersiýa hakykaty» atly sessiýa geçirildi.
TFF-nyň baş sekretary Serdar Geldiýew bu forumyň ähmiýeti hakynda şeýle sözleri beýan etdi: «Bu ýerde köp sanly peýdaly maglumatlar görkezildi. Men gymmatly bilimleri aldym, olar biziň işimiziň netijeliligini ýokarlandyrmaga kömek eder. Şeýlelikde, biz öňe gitmäge we dünýäniň iň gowulary bilen bir hatarda hereket etmäge mümkinçilik alarys».
Çäräniň netijeleri boýunça ähli gatnaşyjylara ýörite şahadatnamalar gowşuryldy. TFF-nyň wekilleri «AFC Awards Riyadh 2025» atly dabara hem gatnaşdylar. Bu ýerde yklym futbolunyň ösüşine uly goşant goşan görnükli oýunçylar, tälimçiler, eminler we assosiasiýalar hormatlandyryldy.
