Türkmenistanyň Futbol federasiýasynyň wekilleri Kanadanyň Wankuwer şäherinde geçirilen FIFA-nyň 76-njy kongresiniň işine gatnaşdylar. Forumyň çäklerinde Türkmenistanyň wekilleri halkara bilermenler bilen milli sportuň ösüşiniň esasy ugurlaryny, şol sanda düzümi döwrebaplaşdyrmak we hünärmenleri taýýarlamagyň innowasion maksatnamalaryny ornaşdyrmak meselelerini ara alyp maslahatlaşdylar.
Kongresiň barşynda türkmen wekiliýeti FIFA-nyň ýolbaşçy düzümi we daşary ýurtlaryň futbol assosiasiýalarynyň ýolbaşçylary bilen birnäçe duşuşyklary geçirdi. Esasy üns çagalar we ýaşlar futbolyny ösdürmek hem-de sport seljermesi ulgamynda tejribe alyşmak meselelerine gönükdirildi. Türkmen tarapy FIFA-nyň täze we kämilleşdirilen tälimçilik usullaryny jikme-jik öwrendi. Bu usullaryň ornaşdyrylmagy milli toparlarda we ýygyndy toparlarda türgenleşik işlerini döwrebap dünýä standartlaryna laýyk getirmäge mümkinçilik berer.
Forumyň gün tertibinde zenanlar futbolunyň meşhurlygyny artdyrmak we strategik meýilleşdiriş meseleleri hem aýratyn orun aldy. Ýurdumyzyň wekilleriniň şeýle giň gerimli çärä gatnaşmagy Türkmenistanyň dünýä futbol jemgyýetçiligine goşulyşýandygyny we halkara meýdançasynda milli sportuň bäsleşige ukyplylygyny ýokarlandyrmaga çalyşýandygyny görkezýär.
