18-19-njy sentýabrda geçiriljek Türkmenistanyň Maýa goýum forumyna (TIF 2025) hasaba alynmagyň resmi taýdan açylandygy çäräniň guramaçylary tarapyndan habar berildi.
Forum Merkezi Aziýanyň halkara biznesiniň, döwlet edaralarynyň wekillerini hem-de bilermenleri jemlejek esasy ykdysady platformalarynyň birine öwrüler. Ol ykdysadyýetiň esasy pudaklarynyň — energetikanyň, ulag ulgamynyň, oba hojalygynyň we innowasion tehnologiýalaryň ösüşine bagyşlanar.
Foruma gatnaşyjylar iki günüň dowamynda Türkmenistanyň möhüm özgertmeleri we strategik başlangyçlary bilen tanşyp bilerler. Olar tematiki ara alyp maslahatlaşmalara we maýa goýum taslamalarynyň tanyşdyrylyşyna gatnaşmak mümkinçiligine eýe bolarlar. Mundan başga-da, bu ýerde B2B we B2G formatlaryndaky duşuşyklar geçiriler, myhmanlar tejribeli bilermenleriň ussatlyk sapaklaryna, medeni we beýleki çärelerine gatnaşyp bilerler.
Geçen ýyl TIF 44 ýurtdan 400-den gowrak gatnaşyjyny, şol sanda 22 halkara guramanyň we 40 diplomatik wekilhananyň wekillerini bir ýere jemledi. Plenar mejlisler, ýöriteleşdirilen sessiýalar we tegelek stollar guraldy. Şeýlelikde, umumy 166 million dollardan hem gowrak serişdä barabar bolan birnäçe şertnama we ylalaşyga gol çekildi.
Bellige almak forumyň resmi saýtynda — «www.tif-turkmenistan.com» internet sahypasynda elýeterlidir. Gönüden-göni gatnaşmak üçin hasaba alynmagyň iň soňky möhleti 2025-nji ýylyň 4-nji sentýabrydyr. Goşmaça maglumatlary +993 (71) 87-18-14 telefon belgisi ýa-da «contact@turkmencongress.com» elektron poçtasy boýunça öwrenip bilersiňiz.
