Türkmenistanyň Demir ýol ulaglary ministrliginiň wekilleri Berlinde geçirilýän «InnoTrans 2026» abraýly halkara sergisine gatnaşýarlar. Işiň birinji gününiň dowamynda pudak edarasy dünýäniň demir ýol bazarynyň öňdebaryjy kompaniýalarynyň ýolbaşçylary bilen birnäçe netijeli duşuşyklary geçirdi.
Wekiliýet «Techne Kirow», «INFRA», «CRRC Nanjing Puzhen», «Alstom», «Huawei» we «Schwihag» ýaly kompaniýalaryň diwarlyklaryna (stendlerine) baryp görüp, olaryň wekilleri bilen hyzmatdaşlygyň möhüm meselelerini we hyzmatdaşlygyň geljekki mümkinçiliklerini ara alyp maslahatlaşdy. Işewür gepleşiklerden başga-da, türkmen hünärmenleri demir ýol pudagy üçin iň kämil tehnologiýalaryň, enjamlaryň we düzümleýin çözgütleriň görkezilýän sergisiniň giň gerimli ekspozisiýasy bilen jikme-jik tanyşdylar.
Forumyň çäklerinde ýene-de birnäçe möhüm duşuşyklar meýilleşdirildi. Hususan-da, wekiliýet «Vossloh», «ArcelorMittal», «System7 Railtechnology», «Pandrol» kompaniýalarynyň ýolbaşçylary, şeýle hem Beýik Britaniýanyň Ulag ministrliginiň we Demir ýol senagaty birleşiginiň (RIA) wekilleri bilen gepleşikleri geçirer. Ertirki günüň, ýagny 24-nji sentýabryň maksatnamasy «voestalpine Railway Systems», «SRT Srl», «ARBZ» we «Kzeso» kompaniýalary bilen gepleşikleri geçirmegi hem-de innowasion ekspozisiýalary mundan beýläk-de öwrenmegi öz içine alýar.
Ýatladyp geçsek, «InnoTrans» dünýäniň demir ýol ulagyny we döwrebap ulag düzümini ösdürmäge bagyşlanan iň uly hem-de abraýly meýdançalarynyň biridir.
