Türkmenistanyň brendleri Parižde geçirilen «Who’s Next» halkara moda sergisinde öz önümlerini hödürlediler. Olaryň sergä gatnaşmagy Ýewropa Bileleşigi tarapyndan maliýeleşdirilýän «Türkmenistan: Söwdanyň durnuklylygy we integrasiýa» taslamasynyň çäklerinde Halkara söwda merkezi (HSM) tarapyndan guraldy.
Sergä gatnaşmak türkmen önüm öndürijilerine özboluşly kolleksiýalaryny halkara hünärmenlerine görkezmäge, şeýle hem önümleri tanyşdyrmagyň, brendleriň bazardaky ornuny kesgitlemegiň, sergi diwarlyklaryny bezemegiň we alyjylar bilen işleşmegiň häzirki zaman usullaryny iş ýüzünde öwrenmäge mümkinçilik berdi.
Türkmenistandan gatnaşyjylaryň diwarlygy Italiýanyň, Fransiýanyň, Ispaniýanyň, Saud Arabystanynyň, Ýaponiýanyň, Gresiýanyň, Zambiýanyň we Ermenistanyň hünärmenleriniň ünsüni çekdi. Serginiň jemleri boýunça daşary ýurtly alyjylar, şol sanda Italiýadan bolan müşderiler täjirçilik hyzmatdaşlygyna gyzyklanma bildirdiler.
Şol bir wagtda türkmen telekeçileri üçin Pariže tanyşlyk sapary guraldy. Olar «Texworld», «Première Vision» we «Who’s Next» ýaly öňdebaryjy dokma we moda sergilerine baryp gördüler, şeýle hem garaşsyz butikleriň, uniwersal dükanlaryň, giň sarp edijiler üçin niýetlenen dükanlaryň we medeni edaralaryň işi bilen tanyşdylar.
Maksatnama gatnaşyjylara dünýäniň moda we dokma pudagyndaky häzirki meýiller, täze materiallar hem-de tehnologiýalar bilen tanyşmaga, şeýle hem Ýewropa bazarynda önümleri tanyşdyrmagyň amaly usullaryny görmäge mümkinçilik berdi.
Sergä gatnaşmak we halkara tejribesini öwrenmek Türkmenistanyň moda we dokma kärhanalarynyň ählumumy söwda zynjyrlaryna goşulyşmagyna ýardam bermek boýunça alyp barýan yzygiderli işleriniň dowamyna öwrüldi.
