Özbegistanyň Fergana şäherinde 12 ýaşa çenli çagalaryň arasyndaky tennis boýunça Merkezi Aziýanyň sebitleýin saýlama tapgyry (ITF Asia 12&U) badalga aldy. Türkmenistanyň oglanlar we gyzlar ýygyndy toparlary ýaryşyň ilkinji gününde Täjigistandan gelen garşydaşlaryny uly hasap bilen ýeňmegi başardylar.
Ilkinji tapgyryň netijeleri
1-5-nji iýun aralygynda geçirilýän ýaryşa sebitiň bäş ýurdunyň — Gazagystanyň, Gyrgyzystanyň, Täjigistanyň, Türkmenistanyň we Özbegistanyň ýygyndy toparlary gatnaşýarlar. Ýaş tennisçiler 15-20-nji sentýabrda Singapurda geçiriljek Aziýa çempionatynyň final tapgyryna berilýän iki ýollanma ugrunda bäsleşýärler.
Gyzlar ýygyndy toparymyz uly tälimçi Ýuriý Rogusskiniň ýolbaşçylygynda Täjigistanyň toparyny 3:0 hasabynda ýeňlişe sezewar etdi:
Safiýa Tribunskaýa Wiktoriýa Protasowany ynamly ýeňdi (6:0, 6:1).
Imiliýa Kambarowa Nafisa Hüseýnowadan 6:0, 6:0 hasabynda üstün çykdy.
Jübütleýin duşuşykda Marýam Şamurzaýewa we Imiliýa Kambarowa garşydaşlaryny 6:1, 6:0 hasabynda ýeňlişe sezewar etdiler.
Oglanlar ýygyndy toparymyz hem tälimçi Gurbanberdi Gurbanberdiýewiň ýolbaşçylygynda täjigistanly deň-duşlaryny 3:0 hasabynda ýeňmegi başardylar:
Sanjar Rejepow Ilýa Tyryşkini 6:0, 6:0 hasabynda utdy.
Ýegenmämmet Nurýagdyýew Abdullo Kadamow bilen bolan duşuşykda asgyn gelýändigine garamazdan, erjellik görkezip, yzyndan ýetdi we 4:6, 6:3, 6:0 hasabynda möhüm ýeňiş gazandy.
Jübütleýin bäsleşikde Dawut Hudaýberdiýew we Sanjar Rejepow garşydaşlaryny 6:1, 6:1 hasabynda ýeňlişe sezewar etdiler.
Öňde jogapkärli oýunlar garaşýar
Indiki tapgyrda biziň toparlarymyz ýaryşyň ýer eýeleri bolan Özbegistanyň ýygyndysynyň wekilleri bilen duşuşarlar. Özbek tennisçileri hem ýaryşyň birinji gününde Gyrgyzystanyň toparlaryny 3:0 hasabynda ýeňipdiler. Garaşylýan bu oýunlar finala barýan ýolda iň esasy bäsleşikleriň biri bolar.
Belläp geçsek, mundan üç ýyl ozal Aşgabadyň Olimpiýa şäherçesinde geçirilen şeýle ýaryş Aziýanyň tennis federasiýasy (ATF) tarapyndan guramaçylygyň nusgasy hökmünde ykrar edilipdi. Şol wagt Türkmenistanyň oglanlar ýygyndysy Özbegistany 3:0 hasabynda utup, taryhy ýeňiş gazanypdy. Geçen ýyl bolsa gyzlar ýygyndy toparymyz Ferganadaky saýlama tapgyrynda kümüş medala mynasyp bolup, Aziýa çempionatynyň finalyna ýollanma alypdy.
Häzirki ýaş türgenlerimiz hem şol şöhratly ýoly dowam etdirip, Türkmenistanyň sport abraýyny halkara derejesinde belende götermegi maksat edinýärler. Saýlama tapgyry 5-nji iýunda tamamlanar.
