Duşanbe şäherinde Täjigistan Respublikasynyň Prezidenti Emomali Rahmonyň hem-de Halkara Delfi komitetiniň howandarlygynda GDA gatnaşyjy döwletleriň ýaşlarynyň XX ýubileý Delfi oýunlary geçirildi. Bu taslamanyň baş maksady medeniýetara gatnaşyklary we halklaryň arasyndaky özara hormaty berkitmekden ybaratdyr.
«Türkmenistan: Altyn asyr» elektron gazetiniň habar bermegine görä, bu medeni forumda ýurdumyza Maýa Kulyýewa adyndaky Türkmen milli konserwatoriýasynyň talyplary wekilçilik etdiler.
«Skripka» ugry boýunça 5-nji ýyl talyp Seýran Atanyýazow diňe russiýaly bäsdeşinden yza galyp, kümüş medala mynasyp boldy. Bu ýaş sazandanyň döredijilik ýolunda eýelän ikinji Delfi «kümüşidir» — ol ilkinji şeýle sylagyny 2023-nji ýylda gazanypdy.
— Elbetde, bu gezek ýeňiş gazanmagy maksat edipdim, — diýip, Seýran aýdýar. — Ýöne başartmady. Şeýle-de bolsa, örän güýçli bäsdeşler bilen bäsleşmek diýseň gyzykly boldy: şeýlelikde, mundan beýläk haýsy ugurda kämilleşmelidigini dessine duýýarsyň. Şonuň üçin hem, Delfi oýunlaryna gatnaşanyma örän şat.
Konserwatoriýanyň beýleki wekilleri hem ýaryşda üstünlikli çykyş etdiler: aýdymçy Asel Ruslanowa «Akademiki aýdym aýtmak» ugry boýunça dördünji orny eýeledi, Anna Weliahmedowa bolsa estrada aýdymy boýunça Hormat hatyna mynasyp boldy.
Konserwatoriýanyň talyplaryna ýoldaşlyk eden kamera ansambly kafedrasynyň uly mugallymy we konsertmeýster Stella Faramazowa çäräniň ýokary guramaçylyk derejesini hem-de döredijilik maksatnamasynyň baýlygyny nygtady. Onuň sözlerine görä, gatnaşyjylar diňe bir öz ussatlyklaryny açyp görkezmek bilen çäklenmän, eýsem, nota ýazgylaryny hem özara işjeň alyşdylar: indi türkmen sazlary GDA ýurtlarynyň ýaş ýerine ýetirijileriniň repertuaryny baýlaşdyrar.
