Türkmenistanly ýaş türgenler küş boýunça Merkezi Aziýanyň çempionatynda ajaýyp netijeleri görkezip, alty medal gazandylar. Şunlukda, türkmen ýygyndysy sebit boýunça ikinji orny eýeledi. Bu barada Türkmenistanyň Küşt federasiýasy habar berdi.
20 — 29-njy iýul aralygynda Yssyk-Köl kölüniň (Gyrgyzystan) kenaryndaky Çolpon-Ata şäherinde wagt gözegçiligi esasynda nusgawy küştden oglanlaryň hem gyzlaryň arasynda küşt boýunça Merkezi Aziýanyň çempionaty geçirildi. Bäsleşige bäş ýurtdan 425 ýaş küştçi gatnaşyp, bu ýerde 8—18 ýaş aralygyndaky küştçüler 12 ýaş derejesinde bäsleşdiler.
Agzalarynyň azdygyna garamazdan, Türkmenistanyň ýygyndy topary (bary-ýogy 15 oýunçy) diýseň ajaýyp netijäni görkezdi: 2 altyn, 3 kümüş we 1 bürünç medal. Şunlukda, jemi 6 medal gazanmagy toparymyzyň umumy hasapda ikinji orny eýelemegine mümkinçilik döretdi. Diňe Özbegistanyň ýygyndysy 16 medal (şol sanda 6 altyn) bilen ildeşlerimizden öňe geçdi.
Çempionatyň ýer eýesi bolan Gyrgyz Respublikasynyň ýygyndysy hem 6 medala eýe çykdy. Muňa garamazdan, olaryň kümüş medallary türkmen ýygyndysynyňkydan azlyk etdi. Gazagystan we Täjigistan bolsa dördünji hem-de bäşinji orunlary paýlaşdylar.
Çempionatda netijeli çykyş eden türkmen küştçüleri:
Çaryýew Çaryhekim (Aşgabat) — 8 ýaşa çenli oglanlaryň arasynda altyn medal
Çaryýewa Anna (Mary welaýaty) — 8 ýaşa çenli gyzjagazlaryň arasynda altyn
Awliýakuliýew Maksat (Lebap welaýaty) — 10 ýaşa çenli oglanlaryň arasynda kümüş
Batyrow Alyhan (Mary welaýaty) — 12 ýaşa çenli oglanlaryň arasynda kümüş
Rejepowa Jahan (Lebap welaýaty) — 16 ýaşa çenli gyzlaryň arasynda kümüş
Muradowa Nebahat (Lebap welaýaty) — 14 ýaşa çenli gyzlaryň arasynda bürünç
Hormat münberinden bir ädim uzakda galan Läle Wepaýewa (10 ýaşa çenli) we Aly Ahmedow (14 ýaşa çenli) öz derejelerinde dördünji orny eýelediler.
Häzirki çempionatyň möhüm aýratynlygy Halkara Küşt federasiýasynyň (FIDE) täzeligi boldy: ýaryşyň netijelerinden soň ilkinji gezek uly ýaşlylar toparyndaky halkara ussatlygyna çenli resmi atlar gowşuryldy. Türkmen medalçylarynyň hemmesi diýen ýaly FIDE-niň ussatlygyna dalaşgär boldular, diňe Jahan Rejepowa zenanlaryň arasynda FIDE-niň ussady diýen ady aldy.
Bu üstünlik Aşgabatda geçirilen halkara ýaryşda 11 ýurduň arasynda birinji orny eýelän 12 ýaşa çenli ýetginjekler toparymyzyň — türkmen mekdep okuwçylarynyň ajaýyp çykyşlarynyň dowamy boldy.
Türkmenistanyň Küşt federasiýasynyň başlygy Wepa Mälikgulyýew şeýle belledi:
«Küştçülerimiz eýýäm diňe medallar üçin däl, eýsem, sebit we dünýä derejesinde toparlaýyn öňdäki orunlary eýelemek ugrunda göreşýärler. Indi esasy wezipe küşt mekdeplerinde, aýratyn hem, 12-16 ýaş aralygyndaky küştçüleriň arasynda usulyýet binýadyny berkitmekdir. Ösüş depginini saklamaly we täze, has düýpli taýýarlyk derejesine geçmeli».
