Bahreýniň paýtagty Manama şäherinde tamamlanan 14 ýaşdan uly bolmadyk ýetginjekleriň arasyndaky Günbatar we Merkezi Aziýa çempionatynyň birinji ýaryşynda türkmen tennisçi gyzlary uly üstünlik gazanyp, iki altyn medal eýelediler.
«ITF Asia 14&U Development Championship – (West & Central Asia)» ýaryşy dünýäniň 13 ýurdundan – Bahreýnden, Iordaniýadan, Yrakdan, Ýemenden, Katardan, Kuweýtden, Liwandan, Omandan, Birleşen Arap Emirliklerinden, Palestinadan, Saud Arabystanydan, Täjigistandan we Türkmenistandan gelen wekilleri bir ýere jemledi. Olar iki hepde dowam edýän Günbatar we Merkezi Aziýa çempionatynyň ýaryşynda medallar ugrunda bäsleşýärler. Biziň ýurdumyza bu bäsleşikde 4 türgen wekillik etdi.
Ýekelikdäki ýaryşda Aşgabat şäherindäki 87-nji orta mekdebiň 7-nji synp okuwçysy Näzli Hudaýgulyýewa hormat münberiniň iň ýokarky basgançagyna çykdy. Ol finalda Iordaniýa Haşimit Patyşalygynyň wekili Aýasofiýa Gokaşaudan üç döwde 0:6, 6:1, 6:3 hasabynda üstün çykyp, ýeňiş gazandy.
Bu ýeňşiň üstüne türgenimiz jübütleýin ýaryşda 12 ýaşly Sülgün Işangulyýewa bilen bilelikde çykyş edip, ýene bir altyn medaly goşmagy başardy. Ýaryşyň bu görnüşiniň finalynda türkmen tennisçileri Liwan Respublikasynyň türgenleri Mariýa El Haçaçeni we Mariam Kamareddineni iki döwde 6:3, 7:5 hasabynda ynamly ýeňip, iň ýokary sylaga mynasyp boldular.
Geçen aýda hem her iki tennisçiniň Bahreýniň Isa-Taun şäherinde Aziýanyň Tennis federasiýasynyň (ATF) howandarlygynda 14 ýaşdan uly bolmadyk ýetginjekleriň arasynda geçirilen «A» derejeli halkara ýaryşynda şowly çykyş edendiklerini bellemek gerek. Şol ýaryşlarda S.Işangulyýewa iordaniýaly A.Gokaşau bilen bilelikde jübütleýin ýaryşynda kümüş medala mynasyp boldy, N.Hudaýgulyýewa bolsa 17 ýurduň wekilleriniň gatnaşan ýekelikdäki ýaryşynda iň güýçli dörtlüge girdi.
Türgenleriň ikisi hem Türkmenistanyň ýygyndy toparynyň agzalarydyr. 19-njy fewralda 13 ýaşy doljak Näzli Hudaýgulyýewa tejribeli tälimçiler Meýlis Orazmuhammedowyň we Ýuriý Rogusskiniň ýolbaşçylygynda yhlasly türgenleşýär.
Sülgün Işangulyýewa bolsa «Jahan» döredijilik merkeziniň okuwçysy. Ol tennis bilen Türkmenistanyň at gazanan tälimçisi Jennet Hallyýewanyň elinde tälim alýar. Türkmenistanyň ýygyndy toparynda bolsa baş tälimçi Ýuriý Rogusskiýniň ýolbaşçylygynda öz ussatlygyny kämilleşdirýär.
Ýakyn günlerde 14 ýaşdan uly bolmadyk ýetginjekleriň arasyndaky Günbatar we Merkezi Aziýa çempionatynyň ikinji iki hepdelik ýaryşynyň ýeňijileri mälim bolar.
