Türkmen tennisçileri Dewisiň Kubogynyň 16 ýaşa çenli ýetginjekleriň arasynda Aziýa we Okeaniýa zolagynda geçirilýän saýlama tapgyrynda üstünlikli çykyşlaryny dowam etdirýärler. 15 toparyň gatnaşmagynda Şri-Lankanyň paýtagty Kolomboda geçirilýän ýaryşda biziň ildeşlerimiz ýokary netijeleri görkezýärler.
Omanyň (3:0) we Mýanmanyň (2:1) toparlaryny ahmyrda goýan türkmen ýygyndysy ýaryşdaky üçünji ýeňşine hem ýetmegi başardy. Ildeşlerimiz ikinji orunda ýerleşen Singapury hem 2:1 hasabynda ýeňdiler we «B» toparçada birinji orny eýelediler.
Şeýlelikde, Türkmenistan bilen Singapur wagtyndan öň çärýekfinala çykmagyň hötdesinden geldiler. Şonuň üçin hem, olaryň arasyndaky duşuşyk diňe kimiň birinji ýa-da ikinji ýerden çykjakdygyny kesgitlemeli boldy.
Duşuşyk iki topar üçin hem ýeňil bolmady. Birinji ýekelikdäki duşuşyk 1 sagat 28 minut dowam etdi we Süleýman Hudaýberdiýew Jastin Liden 2:6, 3:6 hasap bilen utuldy. Şeýlelikde, hasap Singapuryň peýdasyna 1:0 boldy. Ýagdaýy Mýanma bilen oýunda bolşy ýaly, Ýaş olimpiýaçylary taýýarlamak mekdebiniň 9-njy synp okuwçysy Aly Geldiýew düzetdi. Onuň Andre Garnadi bilen geçiren oýny gaty dartgynly bolup, 3 sagat 22 minut dowam etdi we şol günüň ähli duşuşyklarynyň arasynda wagt rekordyny goýdy. Aly güýçli häsiýetini görkezmek bilen birinji seti taý-breýkde 7:6(5) hasaby bilen utdy, ikinji setde hem 6:4 hasabynda ýeňip, umumy netijäni 1:1 etdi.
Şeýle-de bolsa, synaglar munuň bilen tamamlanmady. Ýeňiji tarapy kesgitlejek jübütleýin oýun Aly Geldiýew bilen Kerimgeldi Guldurdyýew üçin ýeňil başlamady — olar ilkinji setde 4:6 hasaby bilen utuldylar. Muňa garamazdan, gysga wagtda güýç toplap, oýnuň gidişini üýtgetdiler: olar ikinji setde 6:4, super taý-breýkde 10:8 hasaby bilen umumy ýeňşi ýetdiler.
Türkmen ýetginjekleri erk-islegiň netijesinde gazanylan ýeňşiň esasynda, «B» toparçadan birinji orun bilen çärýekfinala çykdylar. Indiki tapgyrda olar Filippinler topary bilen duşuşarlar. Filippinler öň Laosyň (2:1) we Guamyň (3:0) toparlaryny ýeňipdi, emma soňky tapgyrda Malaýziýadan 0:3 hasaby bilen utulyp, «C» toparçada ikinji orny eýeledi.
Beýleki çärýek final duşuşyklary: Şri-Lanka — Okeaniýa, Malaýziýa — Singapur we Saud Arabystany — Wýetnam.
