2025-nji ýylyň 23—26-njy iýuly aralygynda Ýewropanyň aýdym-saz paýtagty hasaplanýan Wena ýene-de dünýäniň ýaş zehinli sazandalarynyň duşuşyk ýerine öwrüldi. Bu ýerde 11-nji gezek Bütindünýä orkestrler festiwaly geçirilip, akademiki aýdym-saz pudagyndaky iri halkara forumlaryň biri bolan «Bir geljek, biziň has gowy geljegimiz» atly çäre 40 töweregi ýurtdan orkestrleri jemledi. Bu barada «THP» habar berdi.
Festiwala Türkmenistanyň döwlet simfoniki orkestriniň baş direktory Rasul Klyçewiň ýolbaşçylygyndaky Türkmenistanyň ýaşlar orkestriniň gatnaşandygyny bellemek gerek.
Zehinli sazandalaryň 25-sini özünde jemleýän orkestr türkmen sungat ussatlarynyň täze neslini hödürleýär. Bu gezek olaryň ýerine ýetiriş programmasy dürli medeni ugurlary utgaşdyrdy: nusgawydan halk döredijiligine çenli.
Şeýle abraýly medeni çärä gatnaşmagy diňe bir Türkmenistanyň aýdym-saz toparlarynyň ýokary taýýarlyk derejesini däl, eýsem, Watanymyzyň Merkezi Aziýada medeni dialogyň möhüm merkezi hökmünde ösýän mümkinçiliklerini görkezýär. Ýurdumyz milli we dünýä aýdym-saz mirasyny gorap saklamaga we wagyz etmäge uly ähmiýet berip, medeni hyzmatdaşlygy işjeň ösdürýär.
Ýokary derejedäki ýerine ýetirijiligi, inçe çeperçiligi we stili Türkmenistanyň orkestrini ýurduň iň görnükli aýdym-saz toparlarynyň birine öwürdi. Wenanyň sahnasyndaky çykyş medeni diplomatiýany ösdürmekde we ýaş türkmen zehinleriniň halkara derejesinde ykrar edilmeginde möhüm ädimdir.
