Türkmenistanyň sport ussady Faris Aliýew 23 — 26-njy oktýabr aralygynda Bişkek şäherinde (Gyrgyzystan) geçiriljek pauerlifting boýunça Açyk dünýä çempionatynda ýurdumyza wekillik etmäge taýýarlanýar.
Dünýä birinjiligine gatnaşmak mümkinçiligi onuň halkara giňişligindäki şowly çykyşlarynyň netijesi boldy: türgen bu ýaryşa ýollanmany 6 — 9-njy awgust aralygynda Daşkentde (Özbegistan) geçirilen Aziýa çempionatynda gazanan ýeňşi arkaly eýeledi.
Faris Aliýew güýç üçgörnüşliginiň (pauerliftingiň) iň täsirli we çekeleşikli agramlarynyň biri bolan 93 kg çenli agram derejesinde çykyş edýär. Awgust aýynda Özbegistanda geçirilen Aziýa çempionatynda gazanylan altyn medal diňe bir türgeniň ýokary taýýarlyk derejesini subut etmek bilen çäklenmän, eýsem, onuň dünýä derejesindäki ýaryşa gatnaşmagyna hem resmi taýdan ýol açdy.
93 kg çenli agram derejesi däp bolşy ýaly, üç maşk boýunça (arkaňda ştangany saklamak bilen oturyp-turmak, ýatan ýeriňden ştangany galdyrmak (žim) we ştangany ýerden götermek) uly agramlary eýgerýän iň güýçli pälwanlary bir ýere jemleýär. Bu derejä çykmak türgenden aňryçäk güýç-kuwwaty, berk tertip-düzgüni we inçe tehniki ussatlygy talap edýär.
Bişkekdäki dünýä çempionaty türkmen pauerliftingçisiniň sport ýolunda aýgytly tapgyrlaryň biri bolar, sebäbi bu ýerde ol planetanyň iň güýçli türgenleri bilen ýokary baýraklar ugrunda bäsleşer.
