Özbegistan we Türkmenistan iki ýurduň arasyndaky göni awiagatnawlary täzelemek hakynda ylalaşyk gazandy. Raýat awiasiýasynyň çägindäki resminama Özbegistanyň ulag ministri I.Mahkamow hem-de «Türkmenhowaýollary» döwlet gullugynyň ýolbaşçysy D.Saburow gol çekdi.
— Häzirki wagtda Özbegistan bilen Türkmenistanyň arasynda göni awiagatnawlar ýok, nobatdaky resminama gol çekilmegi bolsa ýurtlaryň arasyndaky ulag gatnaşyklaryny ýola goýmakda möhüm ädim bolup durýar — diýip, I.Mahkamow belläp geçdi.
Ylalaşyk 22-nji awgustda «Awaza» milli syýahatçylyk zolagynda geçirilen üçtaraplaýyn duşuşygyň çäklerinde baglaşyldy. Bu duşuşyga Türkmenistanyň Halk Maslahatynyň Başlygy hem-de Azerbaýjanyň, Özbegistanyň Prezidentleri gatnaşdy. Duşuşykda awiasiýa pudagyny hem goşmak bilen, dürli ugurlarda hyzmatdaşlygy ösdürmäge gönükdirilen birnäçe resminama gol çekildi.
