Türkmenistanyň Söwda-senagat edarasynyň sergi merkezinde Türkiýe Respublikasynyň eksport harytlarynyň sergisi açyldy. Bu giň gerimli gözden geçirilişe doganlyk ýurduň 100-e golaý kompaniýasy we işewürlik birleşmeleri gatnaşýar.
Sergide önümleriň giň toplumy, şol sanda halkyň sarp edýän harytlary, gurluşyk serişdeleri, dokma önümleri, elektronika we maşyn gurluşyk önümleri görkezilýär. Mundan başga-da, ekspozisiýada gurluşyk tehnologiýalary, gaýtadan dikeldilýän energiýa çeşmeleri, lukmançylyk we ulag ulgamyndaky iň täze işläp taýýarlamalar hödürlenilýär.
Çäräni resmi wekiliýet bilen Aşgabada gelen Türkiýe Respublikasynyň söwda ministri Ömer Bolat açdy. Saparyň maksatnamasyna ýokary derejeli duşuşyklar we ikitaraplaýyn işewürlik gepleşikleri girýär. Bu çäre iki ýurduň arasyndaky söwda-ykdysady gatnaşyklary berkitmäge we hyzmatdaşlyk mümkinçiliklerini giňeltmäge gönükdirilendir.
