Aşgabatdaky Halkara ynsanperwer ylymlary we ösüş uniwersitetinde Hytaý Halk Respublikasynyň Sinjan-Uýgur awtonom sebitiniň okuw mekdeplerinde ýokary bilim almak isleýän Türkmenistanyň raýatlaryndan resminamalary kabul etmek kampaniýasyna badalga berildi.
Türkmenistanyň Bilim ministrliginiň maglumatlaryna görä, resminamalary tabşyrmak şu ýylyň 21-nji iýunyna çenli dowam eder. Tabşyrylan resminamalarynyň netijeleri boýunça ýokary baha alan dalaşgärler bilen söhbetdeşlik 23-nji iýunda umumybilim dersleri boýunça geçiriler.
Dalaşgärlere bildirilýän esasy talaplar:
Raýatlygy: Türkmenistan.
Ýaşy: 18-den 25-e çenli.
Bilimi: doly orta bilim hakyndaky attestatynyň ýa-da orta hünär bilimi hakyndaky diplomynyň bolmagy.
Dil bilimi: iňlis dilini hökmany bilmek.
Okadylýan ugurlaryň doly sanawy, bölünen orunlaryň sany, şeýle hem okamagyň we ýaşamagyň jikme-jik şertleri Halkara ynsanperwer ylymlary we ösüş uniwersitetin binasyndaky kabul ediş toparynda berilýär.
Tabşyrylmaly resminamalaryň sanawy Türkmenistanyň Bilim ministrliginiň resmi web-saýtynda çap edildi.
Bäsleşikli seçip alyş tapgyryna gatnaşmak isleýänler bellenen möhlete — 21-nji iýuna çenli resminamalaryny tabşyrmaga we anketalary doldurmaga ýetişmelidirler.
