Türkmenistanyň paýtagtynda Hindistanyň tehniki we ykdysady hyzmatdaşlyk maksatnamasynyň (ITEC) gününe bagyşlanan dabaraly çäre geçirildi. «Ýyldyz» myhmanhanasynda geçirilen duşuşyk bilim maksatnamalarynyň uçurymlaryny, resmi adamlary hem-de iki ýurduň ylmy-akademiki wekillerini bir ýere jemledi.
1964-nji ýyldan bäri hereket edýän «ITEC» maksatnamasy Hindistanyň Daşary işler ministrliginiň adam mümkinçiliklerini ösdürmek ugrunda tejribe alyşmak üçin ykrar edilen platformasyna öwrüldi. Onuň köp ýyllap dowam eden işi netijesinde dünýäniň 160 ýurdunyň 225 müňden gowrak hünärmeni bu maksatnama gatnaşdy. Häzirki wagta çenli Türkmenistandan 500-den gowrak döwlet gullukçysy we 100 çemesi harby işgär Hindistanyň öňdebaryjy okuw merkezlerinde bilim aldy. Bu bolsa ýurtlaryň arasynda ýokary derejeli ynamyň we strategik hyzmatdaşlygyň tassyklanmasydyr.
Çäräniň resmi böleginde Hindistan Respublikasynyň Türkmenistandaky Adatdan daşary we Doly ygtyýarly ilçisi, şeýle hem «ITEC» maksatnamasynyň uçurymlary çykyş etdiler. Olar Hindistanda bilim almagyň şahsy tejribesini paýlaşyp, mugallymlaryň ýokary derejeli taýýarlygyny hem-de alnan bilimleriň Türkmenistandaky hünär işlerinde amaly ähmiýetiniň uludygyny bellediler.
Häzirki zaman Hindistanyň gazananlaryna aýratyn üns berildi. Dünýäniň dördünji ykdysadyýeti bolan bu ýurt IT, gaýtadan dikeldilýän energiýa, kosmos we derman senagaty ýaly ugurlarda öňdebaryjy orny eýeleýär. Türkmen talyplaryna Hindistanyň ýokary okuw mekdeplerinde bilim almak mümkinçiliklerinden has işjeň peýdalanmak teklip edildi. Häzirki wagtda 200-den gowrak Türkmenistanyň raýaty «ICCR» (Hindistanyň medeni gatnaşyklary boýunça geňeşi tarapyndan berilýän talyp haklary) arkaly bilim aldy. Mundan başga-da, her ýyl, takmynan, 100 talyp tölegli esasda Hindistanyň uniwersitetlerine okuwa girýär.
Baýramçylyk ruhuny ýoga boýunça görkezme çykyşlary baýlaşdyrdy. Bu çykyşlar hindi medeniýetiniň gymmatly miraslarynyň biri bolup, beden bilen ruhuň sazlaşygyny aýdyň görkezdi.
Mundan başga-da, «Ýyldyz» myhmanhanasynyň foýesinde tematik sergi guraldy. Sergi myhmanlary Hindistanyň köp asyrlyk taryhy, baý däpleri we medeni köpdürlüligi bilen tanyşdyrdy.
Guramaçylar «Vasudhaiva Kutumbakam» («Bütin dünýä — bir maşgala») diýen gadymy pelsepä ygrarlydyklaryny bellediler. Şeýle-de Hindistanyň nebitgaz pudagy, himiýa senagaty, saglygy goraýyş we sanly infrastruktura ýaly esasy ugurlarda Türkmenistan bilen tejribe alyşmagy dowam etdirjekdigi tassyklandy.
