27—29-njy martda Aşgabadyň gözel künjeginde ýerleşýän «Arkaç» söwda we dynç alyş merkeziniň kinoteatrynda rus kinosynyň festiwaly geçirildi. Maksatnamany režissýor Igor Woloşiniň Alekseý Tolstoýyň meşhur maşgala çeper filmi bolan «Buratino» (2025) ertekisiniň täze düşürilen nusgasy açdy.
«Sizi owadan we myhmansöýer Aşgabatda rus kinosynyň festiwalynyň açylyş dabarasynda görendigime tüýs ýürekden begenýärin. Şeýle däbiň emele gelendigine örän şat. Şunuň bilen baglylykda, Russiýanyň we Türkmenistanyň doganlyk halklarynyň arasyndaky medeni dialogy we dostlukly gatnaşyklary pugtalandyrmaga goşant goşýan ynsanperwer başlangyçlarymyzy yzygiderli goldaýandyklary üçin Türkmenistanyň Prezidenti Serdar Berdimuhamedowa we türkmen halkynyň Milli Lideri, Halk Maslahatynyň Başlygy Gurbanguly Berdimuhamedowa öz hoşallygymy bildirýärin» diýip, Russiýa Federasiýasynyň Türkmenistandaky Adatdan daşary we Doly ygtyýarly ilçisi Iwan Wolynkin öz çykyşynda belledi.
Festiwal «Roskino» kompaniýasy tarapyndan Russiýa Federasiýasynyň Medeniýet ministrliginiň hem-de Türkmenistanyň Medeniýet ministrliginiň goldawy bilen guraldy.
Şu ýyl iki ýurduň medeniýetlerini birleşdirýän çärede diňe täze rus filmleri görkezildi:
Maksim Wolkow tarapyndan surata düşürilen «Lukman Dinozawrow» atly kino (2025) mekdep okuwçysy Fil Dinozawrowyň başdan geçirenlerini beýan etse, režissýorlar Aleksandr Babaýewiň we Wasiliý Rowenskiniň «Gnomlaryň hazynasy» (2025) atly filminde goňşusynyň mirasyny ele geçirmek isleýän Roma atly başdangeçirmeleri halaýan adam bilen bagly garaşylmadyk hyýaly wakalar bolup geçýär. Aleksandr Amirowyň režissýorlyk eden «Gurbaga şaperisi» (2025) atly filmi nusgawy rus halk ertekisine täzeçe garaýşy hödürleýän maşgala filmi görnüşinde surata düşürilipdir.
