Hytaý Halk Respublikasynyň Türkmenistandaky Ilçihanasynda hytaý dilini, medeniýetini we hytaý halkynyň däp-dessurlaryny öwrenmäge uly gyzyklanma bildirýän Türkmenistanyň okuwçylaryna we talyplaryna «Hytaýyň ilçisiniň stipendiýasy» sylagyny gowşurmak dabarasy geçirildi.
Bu başlangyç türkmen-hytaý hyzmatdaşlygyny bilim, ylym, medeniýet we ýaşlar alyşmalary ulgamlarynda mundan beýläk-de berkitmäge möhüm goşant bolup durýar. Sylag zehinli ýaşlary goldamaga, daşary ýurt dillerini öwrenmäge bolan gyzyklanmany höweslendirmäge, şeýle hem iki dostlukly ýurduň arasyndaky ynsanperwer gatnaşyklary ösdürmäge gönükdirilendir.
Dabaranyň dowamynda Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Ji Şumin sylaga mynasyp bolanlary gutlap, Türkmenistan bilen Hytaýyň arasynda bilim ulgamyndaky hyzmatdaşlygyň yzygiderli ösdürilýändigini belledi. Şeýle hem hytaý dilini öwrenmegiň ýaşlar üçin bilim almak, akademiki alyşmalara gatnaşmak, dünýägaraýşyny giňeltmek we halklaryň arasynda özara düşünişmegi pugtalandyrmak babatda täze mümkinçilikleri açýandygy nygtaldy.
Türkmenistanyň Bilim ministrligi Hytaý Halk Respublikasy bilen bilim ulgamyndaky hyzmatdaşlygy mundan beýläk-de ösdürmäge aýratyn ähmiýet berýär. Bilim iki döwletiň arasyndaky ynsanperwer dialogyň möhüm ugurlarynyň biri bolup, ýokary hünärli hünärmenleri taýýarlamak, ýokary okuw mekdepleriniň arasyndaky gatnaşyklary giňeltmek, tejribe alyşmak we bilelikdäki bilim başlangyçlaryny durmuşa geçirmek üçin berk binýat bolup hyzmat edýär.
«Hytaýyň ilçisiniň stipendiýasy» sylagynyň gowşurylmagy Türkmenistan bilen Hytaýyň arasyndaky ynsanperwer hyzmatdaşlygyň okgunly ösdürilýändiginiň aýdyň beýany boldy. Şeýle başlangyçlar medeniýetara dialogy pugtalandyrmaga, ýaşlar üçin bilim mümkinçiliklerini giňeltmäge we Türkmenistan bilen Hytaý Halk Respublikasynyň arasyndaky hemmetaraplaýyn strategik hyzmatdaşlygy mundan beýläk-de ösdürmäge ýardam berýär.
