Düýn — 9-njy noýabrda paýtagtymyzdaky «Aşgabat» köpugurly stadionynyň basketbol arenasynda Halkara Basketbol federasiýasynyň «Onuň dünýäsi — Onuň düzgüni» maksatnamasynyň çäklerinde sportuň şu görnüşinden ussatlyk sapaklary hem-de açyk türgenleşikler ýaýbaňlandyryldy.
Maksatnamanyň ilçisiniň hem-de alypbaryjysynyň basketbol boýunça halkara derejeli sport ussady Nigýar Nagiýewanyň bolmagy ýetginjekler üçin sportuň ajaýyp görnüşine çagyryşdyr. Çünki ol 2017-nji ýylyň V Aziýa oýunlarynyň bürünç medalçysydyr. 2013-nji ýylda Kataryň Doha şäherinde geçen 3x3 basketbol boýunça birinji Aziýa oýunlarynyň bürünç medalynyň eýesi hem-de şol ýurduň «Dream Team» toparynda Aziýanyň iň gowy oýunçysy boldy.
Ussatlyk sapaklary hem-de açyk türgenleşikler ýaşlarda ýatdan çykmajak täsirleri döretdi. Çärä dürli ýaş derejelerindäki çagalar gatnaşdylar. Şolaryň hatarynda 7—12 ýaş aralygyndaky gyzjagazlar hem bar.
Maksatnamanyň jemlenmegi bilen 14 ýaşa çenli gyzjagazlaryň arasyndaky çagalar-ýetginjekler ligasynda «Ýyldyz» hem-de «Belent» toparlary bäsleşdi. 16 ýaşa çenli ýetginjek gyzlaryň duşuşygynda «Belent» we «Ak Şäher» toparlary çykyş etdi.
Garaz, ýetginjekler topy torly halka oklamak boýunça başarnyklaryny görkezdiler.
