Şu gün — 3-nji martda Türkmenistanyň Futbol federasiýasynyň Kubogy ugrunda nobatdaky ýaryşa badalga berilýär.
Kubok ugrundaky bäsleşige sekiz topar gatnaşar: «Arkadag» (Arkadag şäheri), «Ahal» (Ahal welaýatynyň Änew şäheri), «Şagadam» (Balkan welaýatynyň Türkmenbaşy şäheri), «Merw» (Mary welaýatynyň Mary şäheri), «Aşgabat» (Aşgabat şäheri), «Nebitçi» (Balkan welaýatynyň Balkanabat şäheri), «Köpetdag» (Aşgabat şäheri) hem-de 20 ýaşa çenli Türkmenistanyň ýaşlar ýygyndy topary. Ýaryşyň ýeňijisi 12-nji martda belli bolar.
Geçirilen bije çekişligiň netijesinde «A» toparçada «Köpetdag», «Ahal», «Şagadam», «Nebitçi» toparlary, «B» toparçada bolsa ýurdumyzyň U-20 ýygyndy topary, «Arkadag», «Aşgabat» hem-de «Merw» toparlary bäsleşýär.
Deslapky tapgyrda toparlar iki toparça — «A» we «B» toparçalara bölüner. Her toparçada ilkinji iki orny eýelän toparlar ýarymfinala çykmaga hukuk gazanar. Üçünji we dördünji orunlary eýelän toparlar bolsa 5–6-njy hem-de 7–8-nji orunlar ugrunda duşuşyklary geçirerler.
Duşuşyklaryň ählisi paýtagtymyzdaky «Aşgabat» köpugurly stadionynyň merkezi meýdanynda geçiriler.
