Türkmenistanyň saglygy goraýyş we derman senagaty işgärleriniň gününi baýram etmegiň çäklerinde Balkanabat we Mary şäherlerinde täze döwrebap lukmançylyk desgalarynyň açylyş dabaralary boldy. Bu barada «Türkmenistan: Altyn asyr» habar berýär.
Balkan welaýatynyň dolandyryş merkezi bolan Balkanabat şäherinde 305 orunlyk Enäniň we çaganyň saglygyny goraýyş merkezi işe girizildi.
4 we 5 gatly täze binalar toplumy dogluş, ginekologiýa, täze doglan bäbekler hem-de reanimasiýa bölümlerini özünde jemleýär. Bu saglygy goraýyş edarasy dünýä standartlaryna laýyk gelýän kämil tehnologiýalar, şol sanda tomograflar (KT we MRT), mammograf, flýuorograf hem-de döwrebap operasiýa enjamlary bilen üpjün edilendir.
Mary şäherinde 1-nji Saglyk öýüniň ulanmaga berilmegi bolsa Mary welaýatynyň ýaşaýjylary üçin ajaýyp baýramçylyk sowgady boldy.
Täze desganyň düzüminde maslahat beriş-anyklaýyş bölümi, barlaghanalar, fizioterapiýa bölümi, gündizki bejeriş bölümi we dar ugurly hünärmenleriň otaglary hereket edýär. Ýewropanyň öňdebaryjy öndürijileriniň ýokary tehnologiýaly enjamlary anyk hem-de tiz kesel kesgitlemesini geçirmäge we ilata ýokary hilli öňüni alyş hem-de bejeriş kömegini bermäge giň mümkinçilik döredýär.
