Medeni miras we ruhy gymmatlyklar döredijilik adamlarynyň tagallalary esasynda saklanylýar hem-de nesilden-nesle geçirilýär. Balkan welaýatynda geçirilýän Medeniýet hepdeligi hem şeýle ynsanlara bagyşlanýar.
Şu gün medeniýet işgärleri, sungat ussatlary we jemgyýetçilik guramalarynyň wekilleri Gyzylarbat şäherine döredijilik saparyny amala aşyrdylar. Ýerli Medeniýet merkezinde milli sungatymyzyň görnükli wekilleri — Türkmenistanyň halk artistleri Sary Garryýewiň, Giçgeldi Amanowyň we Türkmenistanyň at gazanan bagşysy Baýramguly Aýjanowyň mirasyna bagyşlanan aýdym-sazly we goşgy-gazally duşuşyk geçirildi.
Medeniýet hepdeliginiň ikinji gününiň baý mazmunly maksatnamasy sebitiň şäherlerinde geçirilýän dürli ugurly çäreleri öz içine alýar:
Türkmenbaşy şäheri: çagalaryň döredijilik işleriniň sergisi we bilim ulgamyny sanlylaşdyrmak meseleleri boýunça usuly maslahat.
Balkanabat şäheri: Saparmyrat Türkmenbaşy adyndaky Nebitçiler medeniýet köşgüniň sahnasynda Balkan we Daşoguz welaýatlarynyň sungat ussatlarynyň bilelikdäki konserti bolar, agşam bolsa Döwlet drama teatrynda baýramçylyk spektakly görkeziler.
Balkan welaýat kitaphanasy: «Garaşsyzlykdan galkynýan medeniýet» atly döredijilik bäsleşiginiň jemlerini jemlemek we ýurdumyzyň belli hem-de ýaş şahyrlarynyň gatnaşmagynda «Ylham joşguny» atly edebi agşamy geçirmek.
